Mu gihe hari abaturage batarishyura ubwisungane mu kwivuza (mutuelle de santé), Akarere ka Gatsibo kongeye kugira inama aba baturage gushyira ku isonga kwishyura hakiri kare kuko ibyo bakora byose bishoboka kuko ubuzima buhagaze neza,
N’ubwo bamwe muri abo baturage bagaragaza imbogamizi zirimo iz’ubushobozi buke ndetse n’ikibazo cya sisitemu, Mukamugema Jacqueline, Umukozi Ushinzwe Mituweli mu Karere ka Gatsibo, avuga ko abafite iki kibazo cya sisitemu bagana ubuyobozi bukabafasha, ko ahubwo bashobora kuba babifata nk’urwitwazo kandi atari byo.
Mukamugema avuga ko ibyo kubura ubushobozi bidakwiye kubuza umuntu kwishyura ubwisungane mu kwivuza, akomoza ku kuba abataratanga ubu bwishingizi batangira kugurisha ku myaka bejeje bakabasha kwishyura.
Yagize ati: “Niba imyaka yeze, haracyari amezi atandatu yose, ni menshi. Ntabwo azi rero umunsi azarwarira, ntabwo yavuga ngo azarwara ejo cyangwa ejo bundi, akwiye gutanga amafaranga mu gihe abonye ubushobozi bwo kuyinjiza.”
Mukamugema yaboneyeho kwibutsa abatarishyura ubwisungane mu kwivuza ko bakwiye kubishyira imbere y’izindi gahunda zose kuko iyo umuntu abufite agahura n’uburwayi yivuza, agakomeza imirimo ye nta nkomyi.
Mukamugema yakomeje avuga ko ku rundi ruhande, iyo umuntu adafite mituweli ashobora kurwara, ibyo yaba yarakoreye byose bikagendera mu kwivuza kuko icyo gihe biba bihenze.
Ati: “Niba umuntu akeneye gutera imbere adafite mituweli, nta kintu byamumarira kuko ashobora kurwara, ibyo yaba yarakoreye byose bikagenda yivuza, atanga amafaranga menshi kuko nta bwisungane mu kwifuza afite.”
Yavuze ko kandi n’ubwo uwatanze ubu bwisungane mu kwivuza atarwara, abe bashobora kurwara kandi bakivuza kuko yabishyuriye, ari na yo mpamvu abakangurira kubyitaho.
Bamwe mu baturage bataratanga mituweri bavuga ko batabona uko batanga mituweli biturutse ku kibazo cy’ubushobozi abandi bagasobanura ikibazo cya sisitemu ubwo bahinduzaga ikiciro.
Umwe yagize ati: “Nari mfite icyiciro ku babyeyi, nshatse gukora icyanjye n’umuryango nsaba ko bankuraho bakankorera icyiciro cyanjye, ariko nagiye kwishyura nsanga nta cyiciro mfite ngo byatinze muri sisitemu; ku babyeyi sinkiriho kandi n’icyiciro cyanjye ntagihari; ubwo bansabye gutegereza.”
Umukecuru wo mu Mudugudu wa Kabarore II, Akagari ka Kabarore, mu Murenge wa Kabarore, avuga ko kubona mituweli bimugoye ngo kuko no kubona igitunga umuryango ari ikibazo.
Yagize ati: “Mituweli, nta ntege mfite zihinga, sinzi aho nzayikura kuko no kubona igitunga umuryango biragoye.”
Kuba abaturage batangira kwishyura hakiri kare byitezweho no kuzamura ikigero cyo gutangaho mituweli mu Karere ka Gatsibo, dore ko 76% ari bo bamaze kwishyura ubwisungane mu kwivuza mu buryo bwuzuye, hakwiyongeraho n’abishyuye igice bakaba 83% kandi umuhigo ari 100%.
