Ubuyobozi bw’Intara y’Iburasirazuba bukomeje gushima ubufatanye bw’abaturage n’inzego zitandukanye muri iyi ntara mu gukurikirana iyubahirizwa ry’amabwiriza yo kurwanya Icyorezo cya Covid-19, bugasaba abaturage kutirara.
Ubu butumwa by’ubwihariko bwatanzwe n’Umuyobozi w’Intara y’Iburasirazuba CG Gasana K Emmanuel, bugenewe abaturage b’imirenge ine (Rukara, Murundi, Nyamirama na Mwiri) yo mu Karere ka Kayonza n’imirenge itatu (Muhura, Remera na Kageyo) y’Akarere ka Gatsibo ikiri muri gahunda ya Guma mu rugo.
Avuga basabwa by’umwihariko gukomeza kubahiriza amabwiriza yo kwirinda Icyorezo cya Covid-19 kugirango ubwandu bugabanyuke, nabo bakurwe muri Guma rugo.
Nubwo hari ibindi bikorwa byasubukuwe ndetse n’amasaha yo kugera mu rugo akigizwa inyuma, Guverineri w’Intara y’Iburasirazuba CG Gasana K. Emmanuel hari ubutumwa yatanze.
Yagize ati: “Abaturage turabasaba kutadohoka no kutirara mu kubahiriza amabwiriza yo kwirinda Icyorezo cya Covid-19 kuko kiracyahari.”
Guverineri Gasana akomeza asaba inzego zitandukanye zirimo, Inzego z’ibanze, urubyiruko, abikorera, inzego z’umutekano, gukomeza ubufatanye mu bukangurambaga bugamije kuzamura imyumvire y’abaturage no gutanga amakuru ku hagaragaye imyitwarire yatuma iki cyorezo gikomeza gukwirakwira.
