Ubuyobozi bw’Akarere ka Bugesera bwamuritse kumugaragaro gahunda ya ‘Wisiragira’; uburyo bushya buzajya bufasha abayobozi b’inzego z’ibanze kwakira, gukemura no gukurikirana ibibazo by’abaturage hakoreshejwe uburyo bwo kubika amakuru mu buryo bw’ikoranabuhanga.
Iyi gahunda ya Wisiragira yamuritswe kuri uyu wa Gatatu tariki 30 Kanama 2023 ubwo abasaga 1000 barimo Abayobozi b’inzego z’ibanze kuva ku rwego rw’Umudugudu kugeza ku rwego rw’Akarere ndetse n’abafatanyabikorwa bahuriraga mu nama Mpuzabikorwa y’Akarere ka Bugesera.
Umuyobozi w’Akarere ka Bugesera Mutabazi Richard yagaragaje ko iyi gahunda ya Wisiragira izafasha impande zombi haba ku muturage ndetse n’Umuyobozi mu guhuza amakuru y’ikibazo cy’umuturage. Yavuze ko buri rwego ruzajya rubika amakuru yose y’ikibazo cy’umuturage.
Ati: “Gahunda ya Wisiragira twifuje ko abaturage bose bayimenya, kuko ni gahunda y’ikoranabuhanga kandi ntabwo ari abaturage bayikoresha ahubwo ikoreshwa n’abayobozi kuva ku rwego rw’Akagari kugeza ku rwego rw’Akarere, ndetse twayihaye n’Ubuyobozi bw’Intara. Turagira ngo rero n’abaturage bamenye uburenganzira bwabo ko badakwiye gusiragizwa.”
Wisiragira ikora ite?
Ubu buryo bufasha abayobozi kudakora dosiye nshya kuko abayobozi baba barakiriye ikibazo cy’umuturage baba barabitse amakuru y’ikibazo yabagejejeho n’umwanzuro bamuhaye. Ibi kandi ngo bifasha Abayobozi binjiye mu nshingano vuba kutabeshywa n’umuturage.
Meya Mutabazi ati: “Umuyobozi mushya mu kagari, mu murenge cyangwa no mu Karere arongera agatangira dosiye bundi bushya kandi wenda yararangiye, wajya gushaka amakuru ugasanga ni ukubazanya bya gakondo; ukabaza uwahoze ayoboye hano, uwari uhari urubanza rucibwa, uwitabiriye iyo nteko y’abaturage,… ugasanga amakuru agenda atakara ku buryo mushobora no gutangira ikibazo bundi bushya kandi cyari cyarahawe umurongo.”
Akomeza agira ati: “ Icyo rero twakoze ni uburyo bw’ikoranabuhanga; Umuyobozi w’Akagari ukemuye ikizazo abyandika muri ‘System’ atari yanagikemura; ku buryo niba agishyizemo akamara ukwezi ataragikemura umuturage akajya ku rundi rwego nawe ubireba ukabona koko icyo kibazo yaracyakiriye ukamubaza impamvu ataragikemura.”
Ubu buryo bwo kubika amakuru mu ikoranabuhanga buzafasha abaturage n’abayobozi kubika neza imyanzuro y’ibibazo byakemutse ngo kuko byose bishyirwa muri iri koranabuhanga ku buryo umuturage ugiye ku rundi rwego bitewe no kutanyurwa n’imyanzuro bizajya byorohera uwo ahasanze kuko iyo yanditsemo imyirondoro y’umuturage yakiriye ahita abona amakuru.
Guverineri w’Intara y’Iburasirazuba CG Gasana Emmanuel yashimye iyi gahunda ya Wisiragira, avuga ko izarushaho gufasha abaturage kubona serivisi nziza.
Ati: “Gahunda ya Wisiragira izafasha byinshi kubera ko n’ubundi hari itsinda ry’imitangire ya serivisi, ariko byabaye byiza kugira ngo n’amakuru aboneka yandikwe neza kandi noneho na Sanga Umuturage igire icyo imara bityo abayobozi bakungikanya n’iriya serivisi ya Wisiragira.”
Akarere ka Bugesera ni kamwe mu turere dufite umubare w’abaturage uri hejuru mu Ntara y’Iburasirazuba nk’uko imibare iherutse kugaragaza ko gatuwe n’abaturage 551,103.
