Akarere ka Bugesera ku bufatanye n’Urugaga rw’abikorera(PSF) bagaragarije abashoramari batandukanye amwe mu mahirwe anyuranye ari muri aka Karere bakwiye kubyaza umusaruro, arimo kuba hari kubakwa ikibuga cy’indege ndetse no kuba aka karere ari ubwagukiro bw’umujyi wa Kigali.
Kwereka abashoramari amahirwe ari muri aka karere byanyuze mu biganiro byatanzwe n’abayobozi batandukanye kuri uyu wa Gatatu tariki ya 14 Ukuboza 2022, aho ibi biganiro byari bifite insanganyamatsiko igira iti: “Gufungura amahirwe ari mu bucuruzi n’ishoramari mu iterambere n’impinduka mu bukungu bw’Akarere ka Bugesera.”
Nyuma yo kugaragariza abitabiriye amwe mu mahirwe ari muri aka Karere ka Bugesera, Umuyobozi w’aka Karere Mutabazi Richard, yavuze ko ari ngombwa guhura n’abashoramari bakabasangiza amakuru ndetse no kubereka aho babariza kugira ngo bafashwe mu ishoramari ryabo.
Ati: “Icyo tugomba gukora ni ukubahuza tukabaha amakuru no gukomeza gukurikirana kugira ngo bamenye aho babariza ikibazo bityo tubafashe kwihutisha ishoramari ryabo.Mu by’ukuri icyerekezo cy’Igihugu kirimo kiragana mu Karere ka Bugesera; urebye imishinga minini ihari, amahirwe y’ishoramari ahari ni menshi. Turabakangurira rero kuhagana bakahashora imari kandi twiteguye kubafasha.”
Umuyobozi w’Urugaga rw’abikorera mu Rwanda, Bapfakurera Robert, na we abona ko amahirwe ari mu Karere ka Bugesera akwiye kubyazwa umusaruro.
Ati: “Amahirwe y’ishoramari ari mu Karere ka Bugesera ni menshi; arimo akomoka ku mutungo kamere, akomoka ku Kibuga cy’indege mpuzamahanga, imihanda ihuza aka Karere n’utundi ndetse ukanagera ku gihugu cy’abaturanyi mu Burundi.”
Minisitiri w’ibikorwaremezo Eng. Dr. Nsabimana Erneste yashimangiye ko Akarere ka Bugesera gakwiye guhabwa amahirwe mu kugezwaho ibikorwaremezo nk’akarere gafite icyerekezo gifite impinduka ku iterambere ry’igihugu mu bihe biri imbere.
Ati: “Bugesera; Nyamata by’umwihariko tugomba kuyiha ibikorwaremezo bishya kandi bijyanye n’icyerekezo cy’Igihugu. Rero ubu hakenewe gushyirwaho itsinda rigomba kwiga kwihutisha iterambere rya Bugesera twibanda mu gushyira mu bikorwa iyubakwa ry’ibikorwaremezo bireshya abashoramari.”
Uretse kuba Akarere ka Bugesera gaturiye umujyi wa Kigali bikagaha amahirwe yo kuba ubwagukiro bw’umurwa mukuru w’u Rwanda, kanafite andi mahirwe ajyanye n’aho gaherereye, bikaba byoroshya ubucuruzi bwambukiranya imipaka n’ubuhahirane n’utundi turere, twaba utwo mu Ntara y’Iburasirazuba, Amajyepfo ndetse no mu mujyi wa Kigali. 
