Nyuma y’amahugurwa y’iminsi ibiri agamije kubongerera ubushobozi bwo guhagararira neza bagenzi babo, abana bahagarariye komite z’Ihuriro ry’abana ku rwego rw’Akarere n’Imirenge biyemeje kugira uruhare mu guharanira uburenganzira bw’umwana binyuze mu bikorwa bazakora muri manda yabo y’imyaka itatu.
Ni amahugurwa yasojwe ku mugaragaro kuri uyu wa Gatanu tariki ya 06 Mutarama 2023, n’Umuyobozi w’Akarere wungirije ushinzwe iterambere ry’imibereho y’abaturage, Imanishimwe Yvette, ufite n’abana mu nshingano.
Niwemahoro Providence ni Perezida w’ihuriro ry’abana ku rwego rw’Akarere ufite imyaka 16 y’amavuko, avuga ko nyuma yo guhugurwa we na bagenzi be bazafatanya mu kwesa imihigo bahize igamije guharanira uburenganzira bw’umwana.
Ati: “Muri manda yacu twahize kuzagira uruhare rufatika mu gukura abana mu buzererezi binyuze mu kubegera n’imiryango yabo tukabigisha bakanagaruka no ku ishuri. Ikindi ni uko twiyemeje ko tuzasura abana bagororerwa mu kigo ngororamuco cya Gitagata tukaganira nabo bikabafasha guhinduka vuba mu myumvire n’imitekerereze ku buryo tuzabaremamo icyizere cy’ejo hazaza.”
Umuyobozi w’Akarere ka Bugesera wungirije ushinzwe imibereho myiza y’abaturage, Imanishimwe Yvette, yashimiye aba bana bitabiriye amahugurwa, abasaba ko ibyo bahuguwe bazabikoresha mu kwesa imihigo muri manda yabo y’imyaka itatu.
Yabasabye kandi kuzegera abana bafite ibibazo byihariye bakabafasha mu kubigaragaza ndetse bakanabakorera ubuvugizi.
Ati: “Ndifuza ko ibyo dukuye hano tugiye kubishyira mu bikorwa; Imihigo tukayesa ku bufatanye bwacu twese; yaba ari ihuriro ry’abana, abakozi b’Akarere n’abu’imirenge. Rero iyo uhagarariye umuntu uramwegera ntabwo utegereza ngo akwegere, nawe uramwegera ngo urebe ibibazo afite urusheho kubikemura no kubikorera ubuvugizi kandi bituma uwo mwana anakwibonamo.”
Amahugurwa ya komite z’abana yatowe muri Kanama 2022 mu rwego rwo guteza imbere uburenganzira bw’abana bwo kugira uruhare mu bibakorerwa. Ni nyuma y’aho Leta y’u Rwanda ishyiriyeho Ihuriro ry’abana kuva ku rwego rw’Umudugudu kugeza ku rwego rw’Iguhugu, hagamijwe kandi guha abana urubuga rwo gutanga ibitekerezo ku bibakorerwa, ku bireba igihugu cyabo kandi abantu bakuru bakabatega amatwi hagamijwe gushyira mu bikorwa ihame ryo kwita ku bifitiye umwana akamaro kurusha ibindi.
