Umuryango wa Irafasha Janati na Tuyambazimana Ibrahim utuye mu Murenge wa Kabarore, mu Karere ka Gatsibo wari umaze imyaka isaga itanu ubangamirwaga no kuba mu nzu nto yatumaga na bimwe mu biganiro nk’abashakanye bidashoboka.
Uyu muryango watangaje ibi mu kiganiro na MUHAZIYACU kuri uyu wa kabiri tariki 23 Kamena 2020, mu gikorwa cyo kuwushyikiriza inzu n’ubwiherero wubakiwe yuzuye itwaye hafi miliyoni ebyiri z’ amafaranga y’u Rwanda.
Tuyambazimana Ibrahim na Irafasha Janati bari mu kiciro cy’abatishoboye batuye mu Mudugudu wa Ruhuha, Akagari ka Simbwa babaga mu nzu y’amabati 8, itagira icyumba, yubakishije ibyondo, bakayibanamo n’umwana umwe babyaranye.
Irafasha Janati yakomoje ku mbogamizi bari bafite zo kuba mu nzu nto zirimo no kutaganira neza nk’umugabo n’umugore.
Ati: “Twari tubayeho nabi, ntitwanabonaga n’umwanya wo kuba twaryama wenda nko ku mwanywa ngo tuganire nk’umugore n’umugabo bitewe n’icyocyere kubera inzu ngufi. Ntitwakingaga kubera ko nta rugi, twegekagaho tukagenda. Nta mushyitsi washoboraga kuza iwacu ngo arare;…ariko ubu kuba tubonye inzu nziza biradushimishije.”
Umugabo we Tuyambazimana Ibrahim avuga ko kwimukira mu nzu yagutse kandi yita ‘nziza’ bizihutisha iterambere ryabo.
Ati: “N’iyo nabaga ndyamye imbeba zabaga zindi hejuru kubera ko ari mu byondo ari na hatoya, ariko ubu ubwo mbonye inzu nziza ngiye gushakisha umurimo nkore ntere imbere.”
Sheikh Muhoza Issa Umunyamabanga Nshingwabikorwa w’Umuryango ‘Education Health and Economy’ wubakiye uru rugo inzu rwashyikirijwe none, yabasabye kuyifata neza no kwiteza imbere.
Ati: “Twamwubakiye mu rwego rwo kugira ngo agire aho aba heza kandi hatunganye, abashe kwiteza imbere, bikajyana no gushyigikira gahunda y’imihigo kuko uyu muryango wari ku rutonde rw’imiryango ikwiye gufashwa.”
Umunyamabanga Nshingwabikorwa w’Umurenge wa Kabarore Urujeni Consolée yabwiye MUHAZIYACU ko nk’umurenge muri iyi 2019-2020 bari bafite umuhigo wo kubakira imiryango 38 itaragiraga ho kuba namba, no gusana inzu zangiritse z’imiryango 160.
Ngo kubakira abatari bafite namba uyu mwaka urangiye bikozwe, na ho gusana inzu zangiritse byo hasanzwe izigera kuri 80.
Gitifu Urugeni yasabye umuryango wa Tuyambazimana na Irafasha gufata neza inzu wubakiwe.
Ati: “Twishimiye ko uyu muryango ubonye aho kuba heza, turawusaba gufata neza iyi nzu yahawe ukabera urugero abandi, kandi ukiteza imbere. Kandi dushimiye cyane Umufatanyabikorwa EHE.”
Mu ntangiriro z’uyu mwaka wa 2019-2020, mu mirenge 14 igize Akarere ka Gatsibo hari habaruwe imiryango 428 itishoboye ikeneye kubakirwa ku buryo bwihutirwa. Muri Gicurasi 2020, Ubuyobozi bw’aka karere babwiye MUHAZIYACU ko imiryango 317 ari yo imaze kubakirwa no gutuzwa neza.
