Abaturage batandukanye bo mu Mujyi wa Ngoma i Kibungo bazindukiye muri Siporo Rusange imenyerewe nka ‘Car Free Day’ igamije gushishikariza abantu kwirinda indwara zitandura.
Kuri iki cyumweru tariki ya 22 Mutarama 2023, abatuye Umujyi wa Kibungo no mu bindi bice babyukiye muri siporo rusange izwi nka ‘Car Free Day’ nyuma hanapimwa indwara zitandura.
Ni siporo iba kabiri mu kwezi, aho imihanda imwe n’imwe iba yafunzwe igaharirwa abakoresha amaguru cyangwa amagare.
Ubuyobozi bw’Umurenge wa Kibungo n’inzego z’umutekano bongeye kwibutsa abitabiriye bose akamaro ka siporo mu buzima bw’umuntu ndetse banabakangurira kuyitabira kenshi.
Car Free Day ni siporo rusange yatangijwe muri Gicurasi 2016 mu mujyi wa Kigali, igamije gushishikariza abaturage umuco wo gukora siporo no ku bashishikariza kwirinda indwara zitandukanye, aho bahabwa inama bakanapimwa izi ndwara ku buntu; gusa kuri ubu no mu ntara zindi iyi Siporo irakorwa.
Gukora siporo ni bumwe mu buryo bufasha abantu kwirinda indwara zitandura no gukomeza kugira ubuzima bwiza.
Ubushakashatsi bwakozwe n’Ikigo cy’Igihugu cy’Ubuzima (RBC) ku ndwara zitandura muri 2013, bwagaragaje ko 2.8% bafite umubyibuho ukabije, 14.3% bafite ibiro byinshi bitajyanye n’uko bareshya, naho 7.8% bafite ibiro biri munsi y’ibyo bakabaye bafite.
