Mu Karere ka Rwamagana hari umuhigo w’uko mu tugari twose hagomba kuba hari ibikoresho by’ikoranabuhamga kuri buri mukozi uhakorera, kugeza ubu umurenge wa Kigabiro uje ku isonga mu kwesa uyu muhigo.
Kuri uyu wa 16 Werurwe, ku biro by’Umurenge wa Kigabiro habereye igikorwa cyo gushyikiriza abayobora utugari ibikoresho birimo mudasobwa 4, hamwe n’imashini yifashishwa mu gusohora inyandiko (Printer); ibi bikoresho bitezweho kuzafasha kwesa imihigo no kurushaho gutanga serivisi nziza.
Ntabanganyimana Samuel, ni Umunyamabanga Nshingwabikorwa w’Akagari ka Sovu, yahawe imashini ifasha mu gusohora inyandiko (Printer) yemeza ko byatumaga abaturage batabona serivisi nziza kuko hari zimwe mu nyandiko bajyaga gushakira ku biro by’Umurenge biri mu birometero bitanu, nyamara umuturage yagombye kubibonera ku kagari, ndetse nabo ubwabo nk’abakozi bagorwaga no gutanga raporo z’akazi.
Yemeza ko guhabwa iyi mashini bizabafasha gutanga serivisi nziza, yakomeje agira ati: “Akagari ka Sovu, gafite abaturage b’Abesamihigo banabyumva neza, ubu imbogamizi bari bafite zivuyeho, ubu biradufasha kuzamura imitangire inoze ya serivisi. ”
Aba bagitifu bemeza ko ubu bagiye kurushaho kwesa imihigo kuko bigoranye gukora akazi udafite mudasobwa, cyangwe se bigusaba gutira.
Ingabire Marceline, ni Umunyamabanga Nshingwabikorwa w’Akagari ka Nyagasenyi na we yagize ati: “Icyo twabwira abaturage ni uko serivisi zizihuta, umuturage yakuganaga ukajya gushaka aho utira mudasobwa ngo umuhe serivisi nziza.”
Umuyobozi w’Akarere ka Rwamagana wungirije ushinzwe iterambere ry’ubukungu Rwamunono Kagabo Richards ahamya Umurenge wa Kigabiro ubaye uwa mbere kwesa uyu muhigo, kandi bazakomeza kureba uko bafasha indi mirenge nayo ikabonera abakozi bo mu tugari ibikoresho by’ikoranabuhanga kuko intego ari uko abakora mu kagari bose bagomba kuba bafite ibikoresho bose n’abakorerabushake, kandi byiza bigendanye n’igihe
Umurenge wa Kigabiro ni umwe mu mirenge iherutse guhembwa na Minisiteri y’ubutegetsi bw’Igihugu, nk’imirenge ifite udushya twahize utundi mu bikorwa bigamije iterambere ry’abaturage, ubuzima n’imibereho myiza, agashya kahembwe ni “Twite ku Mwitero Wacu” ko mu Kagari ka Sovu, aho aka gashya kahembwe amafaranga y’u Rwanda miliyoni Ebyiri, aha niho Ubuyobozi bwafashe icyemezo cyo kuguriramo ibikoresho abayobora utugari kugira ngo barusheho gutanga serivisi zinoze kandi zihuse.
