Abahinzi bahinga umuceri mu gishanga cya Mishenyi mu Karere ka Gatsibo bavuga ko bamenye ibanga ryo gukoresha ifumbire bikabaha umusaruro, mu gihe mbere wasangaga batabikozwa.
Kuri ubu iyo ugeze muri iki gishanga usanga imirimo yo guhinga umuceri irimbanije kuko abahinzi baba basiganwa n’igihe kugira ngo kitabacika umusaruro ukazaba muke.
Bamwe mu bahinzi baganiriye na MUHAZIYACU bavuze ko mbere bataramenya ibanga ryo gukoresha ifumbire wasangaga umusaruro babona ari muke ariko ubu babona umusaro uhagije, bavuga ko byabakuye mu bukene
Gacinya Faustin ni umuhinzi w’umuceri, ati: “Iki gishanga kidufatiye runini kuko usanga abenshi nta mirima dufite imusozi ubwo rero urumva ibikenerwa byose tubikura muri iki gishanga, iyo twejeje yaba Mituweli cyangwa amafaranga y’ishuri y’abana ndetse n’ibindi bikenerwa mu buzima bwa buri munsi n’aha biva.”
Yakomeje avuga ko mbere bataramenya guhinga bakoresheje ifumbire umusaruro wari muke cyane ugereranyije n’uwo babona ubu.
Ati:”Mbere tutaremenya ibyiza byo gukoresha ifumbire wasangaga umuntu ahinga ariko umusaruro ukaba muke ariko ubu aho twakuraga imifuka 5 y’umuceri ubu umusaruro wikubye kabiri kubera ifumbire ubu tuhasarura imifuka 10.”
Undi muhinzi uhinga umuceri muri iki gishanga yagize ati: “Ubu twavuye mu bukene kuko duhinga umuceri kandi tukawuhinga neza, ubundi wasangaga duhinga ngo umuntu abone uwo yirira gusa ariko ubu turarya ndetse tukagurisha tukiteza imbere, tukabona amafaranga yo gukemura ibibazo tuba dufite byo mu murugo.”
Ubuyobozi bw’Akarere ka Gatsibo buvuga ko iki gishanga gifite umumaro munini cyane ku bukungu bw’Akarere kuko iyo umusaruro wiyongereye n’ubukungu bw’akarere bwiyongera ndetse n’umuturage akiteza imbere.
Igishanga cya Mishenyi giherereye mu Karere ka Gatsibo mu murenge wa Kabarore mu kagari ka Kabeza kikaba gihingwa cyane n’abaturage batuye mu nkengero zacyo bo mu mudugudu wa Mishenyi.
