Abaturage bo mu Karere ka Ngoma, mu Murenge wa Murama bishimiye ko bari guhabwa serivise baziherewe mu mudugudu wabo n’ubuyobozi bw’umurenge, bakagaragaza ko byaborohereje gukora urugendo bajya ku biro by’umurenge, bakagaragaza ko kugera ku biro by’umurenge byajyaga bibagora.
Iyi gahunda yiswe “Serivise hafi yawe mu kirometero kimwe ku mudugudu” yatangiye kuri uyu 07 Ukwakira 2026 itangirizwa ku mugaragaro mu Kagari ka Mvumba, mu Murenge wa Murama, mu rwego rwo korohereza abaturage kubona serivisi z’ingenzi hafi y’aho batuye.
Muri iyi gahunda, abaturage bahabwa serivisi zitandukanye zirimo irangamimerere, Ejo Heza, serivisi z’ubutaka ndetse n’ubwisungane mu kwivuza (Mituweli), aho abakozi bazitanga bajya aho abaturage batuye aho kubasaba gukora urugendo rujya ku biro by’Umurenge.
Iyi gahunda irimo gushyirwa mu bikorwa mu Murenge wa Murama kuko hari utugari tumwe na tumwe turi kure y’ibiro by’Umurenge. Bamwe mu baturage kugira ngo bagere ku biri by’umurenge, bisaba kunyura mu mirenge ya Kibungo na Rukira, bikaba bibagora cyane cyane iyo bagiye gushaka serivisi ntibazibone, bigasaba ko bongera gukora urwo rugendo.
Abaturage baganiriye na MUHAZIYACU bavuze ko iyi gahunda yabagabanyirije ingendo kandi ikabafasha gukemura ibibazo byabo hafi y’aho batuye.
Majyambere Peter, utuye mu Mudugudu wa Nyakagezi, yagize ati: “Ubuyobozi bwatwegereye twishimye uri kugira ikibazo bagahita bagufasha ako kanya bitanabaye ngombwa ko tujya ku murenge, hano biroroshye ubu nari mfite ikibazo muri Ejo Heza ariko ubu gihise gikemuka. Ubundi kugera ku murenge bisaba gutanga amatike menshi ariko ubu ntabwo ariko biri kugenda twishimye cyane.”
Mukagombaniro Françoise, utuye mu Mudugudu wa Gitesanyi, na we yavuze ko iyi gahunda yamufashije kubona serivisi ya Mituweli atiriwe akora urugendo rujya ku biro by’Umurenge.
Yagize ati: “Uyu munsi twanezerewe, hari gahunda yo kwegera abaturage, ubu badufashije nkanjye nafashijwe kuri mituweli kandi byahise bikemuka, turashimira imiyoborere myiza ubuyobozi bwacu bukomeje kutugezaho. Gutanga Mituweli ubu byoroshye kandi byari byaranze nirirwa niruka njya ku kagari ariko ubu abakozi bose barahari ukeneye gutanga serivise aba ahari ku buryo ahita abikemura.”
Umunyamabanga Nshingwabikorwa w’Umurenge wa Murama, Mbabazi Kellen, yavuze ko iyi gahunda igamije gukemura ibibazo by’abaturage badashobora gukora ingendo ndende bajya ku biro by’Umurenge.
Yagize ati: “Iyi gahunda igamije gukemura ibibazo by’abaturage bafite badakoze urugendo baza kudushaka ku murenge, hano duhita tubafasha kuko haba hari abakozi bose, bazanye imashini, hari interinete ku buryo serivise zose tuba tuzifite, twabonye kuba twaza mu mudugudu tukabaha serivise aribyo byatuma batavunika baza ku murenge.”
Yasobanuye ko iyi gahunda itandukanye n’inteko z’abaturage cyangwa umugoroba w’umuryango, kuko muri yo umuturage ahabwa serivisi akeneye ku buryo ikibazo cye gishobora gukemuka ako kanya.
Ati: “Ubundi tujya dusanga abaturage mu nteko, tubasanga mu mugoroba w’umuryango ariko kano gashya ni uko ho serivise umuturage akeneye duhita tuyimuha, buriya iyo ari mu nteko hari igihe ikibazo kinaniranye umuturage ukamubwira ngo uzansange ku biro by’umurenge ariko hano duhita tumufasha ako kanya uko ikibazo yaba afite cyose cyaba kimeze.”
Mbabazi yavuze ko intego ari ugutuma umuturage atongera koherezwa ahandi kugira ngo abone serivisi, ahubwo akayibona mu gace kamwegereye.
Umunyamabanga Nshingwabikorwa w’Umurenge wa Murama yanavuze ko ku munsi iyi gahunda ikorerwaho, abakozi batanga serivisi zitandukanye baba bahari kugira ngo bakire abaturage imbonankubone.
Ati: “Hano tuba turi kumwe n’abakozi batanga serivise zihura n’abaturage amaso ku maso, iki gikorwa tugikora ku wa gatatu tuba twateguje, abaturage bashobora no kuva mu yindi midugudu ku buryo baza muri uwo bakahakira serivise, icyo twabwira abaturage ni uko bakwitabira tukabafasha, bajye bakurikira amatangazo ubundi baze aho tuba twateguye tubafashe mu buryo bukwiye.”
Nubwo iyi gahunda yatangijwe ku mugaragaro kuri uyu munsi, ubuyobozi bw’Umurenge wa Murama buvuga ko yari imaze amezi ane igeragezwa, aho muri icyo gihe hamaze gukemurwa ibibazo bigera kuri 30.
