Minisitiri w’Ubumwe bw’Abanyarwanda n’inshingano Mboneragihugu, Dr. Bizimana Jean Damascène yasabye abagize Ihuriro ry’Ubumwe n’Ubudaheranwa mu turere tugize Umujyi wa Kigali n’Akarere ka Bugesera gukomeza kugira uruhare mu biganiro byimakaza Ubumwe n’Ubudaheranwa kugira ngo bikomeze gufasha umuryango Nyarwanda kuwomora ibikomere bituruka mu mateka ya Jenoside yakorewe Abatutsi.
Ibi yabigarutseho kuri uyu wa Kabiri tariki 06 Ukwakira 2026, ubwo yifatanyaga n’abagize Ihuriro ry’Ubumwe n’Ubudaheranwa mu turere tugize Umujyi wa Kigali n’Akarere ka Bugesera muri ibi biganiro.
Ni ibiganiro byibanze ku ntambwe imaze guterwa mu rugendo rwo kwimakaza Ubumwe n’Ubudaheranwa bw’Abanyarwanda nyuma y’imyaka 32 Jenoside yakorewe Abatutsi ihagaritswe, ababyitabiriye basabwa kurebera hamwe no gushaka ibisubizo ku nzitizi zikibangamiye Ubumwe n’Ubudaheranwa bw’Abanyarwanda.
Ashingiye ku nyandiko n’ibimenyetso by’amateka, Minisitiri Dr.Bizimana yagaragaje ko ivanguramoko ryaranze ubutegetsi bwa Perezida Kayibanda na Habyarimana mu nzego zitandukanye nk’imirimo ya Leta n’Uburezi kugeza bukoze Jenoside yakorewe Abatutsi mu 1994.
Yavuze ko u Rwanda rwagize ibyago byo kuyoborwa n’abategetsi batigeze bibona nk’Abanyarwanda, yaba ari Prezida Kayibanda n’ishyaka rye PARMEHUTU cyangwa Habyarimana n’ishyaka rye MRND, ahubwo bahamyaga ko Abatutsi badakwiye kugira uburenganzira bumwe nk’ubw’abandi Banyarwanda.
Minisitiri Dr. Bizimana yavuze ko ibiganiro bishimgiye ku kuri byomora ibikomere bituruka ku mateka ya Jenoside yakorewe Abatutsi.
Ati: “Turashimira Unity Club yateguye ibi biganiro ku bufatanye na MINUBUMWE. Ibiganiro bishingiye ku kuri bigira umumaro mu komora ibikomere by’amateka. Turagaya kandi abagitsimbaraye ku ngengabitekerezo ya Jenoside harimo n’abagize uruhare muri Jenoside yakorewe Abatutsi bakidegembya mu mahanga.”
Yakomeje agira ati: “Turasaba abitabiriye ibi biganiro kuba ba Ambasaderi b’Ubumwe n’Ubudaheranwa, ibiganiro bikagezwa mu byiciro byose by’Abanyarwanda harimo abari mu madini n’amatorero, imiryango itegamiye kuri Leta, inzego z’abagore, n’urubyiruko, abarimu, n’abandi bari mu mirimo itandukanye.”
Umuyobozi w’Umujyi wa Kigali Dusengiyumva Samuel yagaragaje ko kuzirikana ubumwe atari ikintu wubaka umunsi umwe ngo bibe birangiye ahubwo ari urugendo. Yavuze ko ubumwe bugomba guhora bwubakwa, bukabungabungwa kandi bukarindwa.
Ati: “Amateka yacu yatweretse ko iyo ubumwe busenyutse, bigira ingaruka mbi nyinshi. Ariko nanone yatweretse ko iyo Abanyarwanda bashyize hamwe, bagasangira icyerekezo kandi bagaharanira icyiza bashobora guhangana n’ibikomeye no kugera kuri byinshi.”
MINUBUMWE yagaragarije abitabiriye ibiganiro by’Ihuriro ry’Ubumwe n’Ubudaheranwa barimo abari abayobozi, abayobozi mu nzego zitandukanye, abahagarariye imiryango itegamiye kuri Leta, abayobozi b’amadini n’amatorero, abagore n’urubyiruko, urugendo rw’Ubumwe n’Ubudaheranwa bw’Abanyarwanda, aho Ubumwe bw’Abanyarwanda bwavuye ku gipimo cya 82.3% muri 2010 kikagera kuri 95.3% mu mwaka wa 2025.
Ibi biganiro bizakomereza mu Ntara, Amahuriro y’ubumwe n’ubudaheranwa ahurire mu Turere twagenwe.
