Abaturage bo mu Karere ka Rwamagana basabwe kwitabira amatora y’inzego z’imitegekere y’Igihugu zegerejwe abaturage n’Inama z’Igihugu azatangira ku wa 24 Ukwakira 2026, bakazatora ku gihe kandi bagakoresha neza uburenganzira bwabo bwo gutora.
Mu butumwa bwatanzwe nyuma y’Umuganda usoza uku kwezi kwa Nzeri, harimo n’ubutegeza abaturage kuzitabira amatora yo muri uyu mwaka wa 2026. Mu Murenge wa Nzige, mu Kagari ka Kigarama, Umukozi uhagarariye Komisiyo y’Igihugu y’Amatora mu turere twa Rwamagana na Kayonza, Kanzayire Velene, yasabye abaturage kwitegura aya matora no kuyagiramo uruhare.
Kanzayire yasabye abaturage kuzatora ku gihe kandi bagakoresha neza uburenganzira bwabo bwo gutora, abasaba kandi gukurikiza amabwiriza azatangwa na Komisiyo y’Igihugu y’Amatora, ati: “Turabasaba kwitabira amatora, mukazatora ku gihe kandi mukazatora neza. Ni inshingano n’uburenganzira bw’umuturage kugira uruhare mu matora.”
Yibukije ko icyiciro cya mbere cy’amatora kizaba ku wa 24 Ukwakira 2026, ku rwego rw’Umudugudu, bityo abaturage bakwiye kwitegura hakiri kare no gukurikirana amakuru ajyanye n’amatora.
Amatora y’inzego z’imitegekere y’Igihugu zegerejwe abaturage n’Inama z’Igihugu azatangira ku wa 24 Ukwakira 2026, azakorwa mu byiciro bitandukanye kuva ku rwego rw’Umudugudu, kugeza ku rwego rw’igihugu mu byiciro byihariye; aho azasozwa ku wa 30 Ugushyingo 2026 hatorwa abagize Komite Nyobozi z’Inama z’Igihugu ku rwego rw’igihugu.
Ku wa 24 Ukwakira 2026, hazatorwa abagize Komite Nyobozi y’Umudugudu, Abahagarariye abaturage n’abakandida b’abagore ku rwego rw’Umudugudu.
Ku wa 31 Ukwakira 2026, hazatorwa abahagarariye abaturage n’Abajyanama b’abagore ku rwego rw’Akagari, ni mu gihe Ku wa 7 Ugushyingo 2026, hazatorwa Abajyanama bahagarariye ibyiciro byihariye n’inzego z’Inama z’Igihugu ku rwego rw’Umurenge.
Ku wa 14 Ugushyingo 2026, hazatorwa Abagize Komite Nyobozi z’Inama z’Igihugu ku rwego rw’Akarere.
Ku wa 17 Ugushyingo 2026, hazatorwa Abajyanama b’abagore batanu bahagarariye 30% by’Inama Njyanama y’Akarere.
Ku wa 21 Ugushyingo 2026, hazatorwa Abajyanama rusange Umunani(8) naho Ku wa 24 Ugushyingo 2026, hazatorwa Abagize Inama Njyanama y’Akarere na Komite Nyobozi y’Akarere.
Ku wa 28 Ugushyingo 2026, hazatorwa Inama y’Igihugu y’Abagore ku rwego rw’Intara/Umujyi wa Kigali ndetse n’Inama y’Igihugu y’Abantu bafite Ubumuga ku rwego rw’Intara.
Ku wa 30 Ugushyingo 2026, hazatorwa Abagize Komite Nyobozi z’Inama z’Igihugu ku rwego rw’igihugu.
Bamwe mu baturage bitabiriye Umuganda wabereye mu Kagari ka Kigarama baganiriye na MUHAZIYACU, bavuga ko biteguye kuzitabira amatora no gukoresha uburenganzira bwabo bwo gutora.
Nziyomaze Anastase yagize ati: “Amatora ni uburenganzira bwacu. Tuzitabira kandi tuzatora ku gihe kugira ngo tugire uruhare mu gushyiraho abayobozi bacu.”
Kayiranga Luis yavuze ko kuba amatora azabera ku rwego rw’Umudugudu ari ingenzi, kuko abayobozi batorerwa kuri uru rwego baba begereye abaturage, ati: “Umuyobozi wo ku Mudugudu aba azi abaturage n’ibibazo byabo, ni yo mpamvu ari ngombwa ko twitabira aya matora kandi tugatora neza.”
Abaturage basabwe gukomeza gukurikirana amakuru atangwa na Komisiyo y’Igihugu y’Amatora kugira ngo bamenye neza gahunda y’amatora n’ibindi bizakenerwa mu byiciro bitandukanye by’amatora.
