Urwego rw’Igihugu rw’Ubugenzacyaha (RIB) rwatangaje ko rwafashe abandi bantu 46 bakekwaho kugira uruhare mu gukopeza abanyeshuri ibizamini bya Leta bisoza amashuri abanza n’ayisumbuye, ndetse ko dosiye zabo zamaze gushyikirizwa Ubushinjacyaha.
Aba biyongereye ku bandi 81 bari barafashwe mbere, ubu bakaba bakurikiranwe mu butabera.
Umuvugizi w’Urwego rw’Igihugu rw’Ubugenzacyaha (RIB), Dr. Murangira B. Thierry, yavuze ko iperereza rigikomeje no mu tundi Turere.
Yagize ati: “Nyuma yo guta muri yombi 81 ba mbere ubu bari mu butabera, hafashwe abandi 46 na bo dosiye zabo twamaze kuzohereza mu Bushinjacyaha. Icyo twakwibutsa abantu ni uko iperereza rigikomeje no mu tundi Turere.”
Aba bantu 46 bafashwe bakomoka mu turere dutandukanye. Harimo umwe wo mu Karere ka Kirehe, 11 bo muri Kayonza, batandatu bo muri Rwamagana, 16 bo muri Nyabihu, babiri bo muri Musanze, batatu bo muri Gicumbi, bane bo muri Nyamagabe na batatu bo mu Karere ka Huye.
RIB yavuze ko dosiye z’abafashwe bo mu turere twa Kirehe, Kayonza, Rwamagana, Nyabihu, Musanze, Nyamagabe na Huye zashyikirijwe Ubushinjacyaha ku wa 14 Nzeri 2026.
Naho dosiye z’abafashwe bo mu Karere ka Gicumbi zo zashyikirijwe Ubushinjacyaha ku wa 15 Nzeri 2026.
RIB yavuze ko iperereza ry’ibanze ryagaragaje uburyo budasanzwe bwakoreshejwe mu gufasha abanyeshuri gukopera. Aho bamwe mu barimu bigisha mu mwaka wa gatandatu w’amashuri abanza bakekwaho kwihindura abatetsi kugira ngo babashe kugera ahakorerwaga ibizamini bya Leta.
Mu buryo bumwe bwagaragajwe na RIB, umwe mu bakekwaho uruhare muri ibyo bikorwa yajyanaga ibyo guteka aho ibizamini byaberaga. Umwe mu bagenzuraga ahakorerwaga ikizamini akamufasha kubijyana mu gikoni, aho ikizamini cyakorwaga, nyuma bakajya gukopeza abanyeshuri.
Aba bantu bose bakurikiranyweho ibyaha bibiri. Icya mbere ni gukoresha ububasha umuntu ahabwa n’itegeko mu nyungu ze bwite, icyaha kiri mu byiciro by’ibyaha bya ruswa.
RIB ivuga ko umuntu uramutse ahamwe n’iki cyaha, ahanishwa igifungo kiri hagati y’imyaka irindwi n’icumi, hakiyongeraho ihazabu iri hagati ya miliyoni eshanu na miliyoni 10 Frw, hashingiwe ku ngingo ya 15 y’Itegeko ryerekeye kurwanya ruswa. Bakurikiranywe kandi ku cyaha cyo kumena ibanga ry’akazi, giteganywa n’ingingo ya 150 y’Itegeko riteganya ibyaha n’ibihano muri rusange.
