Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yasabye urubyiruko gukoresha neza amahirwe Igihugu cyabashyiriyeho, rukirinda ibiyobyabwenge n’ibinyobwa bitujuje ubuziranenge, kugira ngo rubashe kugira uruhare mu iterambere ry’Igihugu no kukibera imboni nziza.
Ibi ubuyobozi bwabigarutseho kuri uyu wa 12 Kanama 2026, ubwo mu Karere ka Nyagatare, mu Murenge wa Karama, Akagari ka Kabuga, hizihizwaga Umunsi Mpuzamahanga w’Urubyiruko. Muri ibi birori, urubyiruko rwasobanuriwe amahirwe Igihugu cyashyizeho arufasha kwiteza imbere, arimo imishinga itandukanye ishyigikira abafite udushya ndetse n’izindi gahunda zigamije guteza imbere imishinga y’urubyiruko n’ibindi.
Umuyobozi w’Akarere wungirije ushinzwe imibereho myiza y’abaturage, Murekatete Juliet, yavuze ko urubyiruko rukwiye gufata iya mbere mu bikorwa byubaka Igihugu, kuko ari imbaraga zacyo z’uyu munsi n’ejo hazaza.
Yagize ati: “Turakangurira urubyiruko kwirinda ingeso zo kwishora mu biyobyabwenge kuko umusaruro Igihugu kibatezeho mutawutanga mwarabaswe n’ibiyobyabwenge. Rero muharanire kuba urubyiruko rutewe ishema no gukora ibiteza imbere Igihugu aho kugisubiza inyuma.”
Yasabye kandi urubyiruko guhuza imbaraga no kugira uruhare mu kurwanya ibiyobyabwenge, inzoga n’ibindi binyobwa bitujuje ubuziranenge.
Yagize ati: “Ubwo twakusanyaga inzoga zitujuje ubuziranenge, birababaje ko wasangaga abantu bazinywaga cyane ari urubyiruko. Hanyuma ni gute muzabera imboni nziza Igihugu cyanyu namwe ubwanyu mutareba inzoga zarabateye ubuhumyi? Ni byiza ko urubyiruko tuba imbaraga z’Igihugu koko, zubaka kandi vuba, ariko dufite n’ubuzima buzima.”
Bamwe mu rubyiruko baganiriye na MUHAZIYACU bavuze ko ubutumwa bahawe bukwiye kubafasha guhindura imyumvire, bakirinda ibikorwa bishobora kubangamira ubuzima bwabo n’iterambere ry’Igihugu.
Nayituriki Diane, yagize ati: “Biba bibabaje kubona umuntu w’umusore cyangwa se w’inkumi agenda yandika umunani mu muhanda kubera inzoga zitujuje ubuziranenge. Rero icyo dusabwa nk’urubyiruko ni ukureka ibyo byose bibi bituma tudatanga umusanzu wacu ku Gihugu cyatubyaye kugira ngo natwe twubake ejo heza h’Igihugu.”
Uwingeneye Clarisse na we yagize ati: “Ni byo koko urubyiruko dukwiye kuba maso tugaharanira ibyiza byose ku Gihugu, tugafatanya n’ubuyobozi kwigisha abakora ibikorwa bitemewe ndetse no gutanga amakuru ku gihe. Ibyo ntitwabigeraho natwe twarasarishijwe n’inzoga cyangwa se ibiyobyabwenge muri rusange.”
Ikundabayo Clever yagize ati: “Tugomba kumva inama duhabwa n’ubuyobozi, tugakoresha amahirwe Igihugu cyadushyiriyeho. Iyo urubyiruko rukoresheje imbaraga zarwo neza, rufasha imiryango yarwo ndetse n’Igihugu muri rusange.”
Mu Karere ka Nyagatare habarurwa urubyiruko rusaga 177,981, barimo abagore 90,154 n’abagabo 87,827, Ubuyobozi bw’Akarere bushingiye ku ngano y’urubyiruko rufite bwizera ko rufashe iya mbere mu bikorwa byubaka Igihugu iterambere ryacyo ryakihuta kurushaho cyane ko urubyiruko ari imbaraga z’ubu n’iz’ejo hazaza.
