Ubuyobozi bw’Akarere ka Ngoma bugaragaza ko bwihaye intego yo kongera umusaruro w’ibigori mu gihembwe cy’ihinga cya 2027A, bigahingwa kuri hegitari 20,943, mu rwego rwo gukomeza kubungabunga umutekano w’ibiribwa no kuzamura imibereho y’abaturage.
Ibi byagarutsweho mu nama yo gutegura igihembwe cy’ihinga cya 2027A, aho hagaragajwe gahunda zitandukanye zigamije gutuma ubuhinzi bukorwa neza, zirimo gutanga imbuto n’ifumbire ku gihe, gukoresha ubuhinzi bubungabunga ubutaka (Conservation Agriculture), no gukomeza gahunda yo guhuza ubutaka.
Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, yavuze ko icy’ingenzi ari ukwitegura hakiri kare kugira ngo abaturage bazagire umusaruro uhagije.
Ati: “Igihembwe cy’ihinga tugomba kugifata nk’umwanya wo kurushaho gushimangira umutekano w’ibiribwa. Umuturage ushonje biragoye ko wakwitega ibindi bikorwa by’iterambere. Turasaba abafatanyabikorwa bose mu rwego rw’ubuhinzi gukomeza kwegera abaturage, babigisha uburyo bwiza bwo guhinga no kubungabunga ubutaka kugira ngo umusaruro wiyongere.”
Yakomeje avuga ko iteganyagihe rigaragaza ko hazaboneka imvura ihagije, bityo hakaba hakenewe ko imbuto n’inyongeramusaruro bibonekera ku gihe, ndetse ibibazo byose bishobora kuvuka bigakemurwa bitarabangamira ibikorwa byo guhinga.
Yagize ati: “Dufite amahirwe y’uko iteganyagihe ritwereka ko imvura izaba ihagije. Icyo dusabwa ni ukureba ko imbuto n’ifumbire biboneka ku gihe, abaturage bagahabwa serivisi zibafasha guhinga neza. Nidufatanya twese, birashoboka ko twakuba kabiri umusaruro, ari na byo biri mu ntego za NST2.”
Imibare y’Akarere ka Ngoma igaragaza ko muri iki gihembwe hateganyijwe guhingwa ibigori kuri hegitari 20,943, bikaba ari kimwe mu bihingwa byahawe umwanya munini muri site zahujweho ubutaka.
Hanateganyijwe gukwirakwiza imbuto z’ibigori zingana n’ibiro 252,633, ndetse n’ifumbire irimo DAP, UREA na NPK kugira ngo abahinzi babone ibyangombwa byose bibafasha kongera umusaruro.
Akarere kanateganya gushyira imbaraga mu buhinzi bubungabunga ubutaka kuri hegitari 10,500, hagamijwe kurinda isuri, kubungabunga ubutaka no kongera umusaruro mu buryo burambye.
