Mu rwego rwo guca ikorwa, icuruzwa n’ikoreshwa ry’ inzoga zitujuje ubuziranenge, ku bufatanye bw’Ubuyobozi bw’Akarere ka Bugesera, RIB na Polisi y’u Rwanda ndetse n’abaturage, hamenwe inzoga zitujuje ubuziranenge zisaga litiro ibihumbi bitatu zengerwaga mu ruganda ‘Umuhigo-Ryohera Ltd’ ruherereye mu Murenge wa Nyamata; ruhita runafungwa.
Igikorwa cyo kumena izi nzoga zitujuje ubuziranenge cyabereye mu Kagari ka Kayumba mu Murenge wa Nyamata ku mugoroba wo kuri uyu wa Kabiri tariki 21 Nyakanga 2026.
Nyuma yo gusoza igikorwa cyo kumena izi nzoga zitujuje ubuziranenge zengerwaga mu ruganda ‘Umuhigo-Ryohera Ltd’, Umuyobozi w’Akarere ka Bugesera, Mutabazi Richard yasobanuye ko uru ruganda rwakoreragamo inzoga rutasabiye ibyangombwa bityo bagasanga ari inzoga z’urundi ruganda rwafunzwe rukaza gukomerezamo ibikorwa byo kwenga inzoga zitemewe.
Meya Mutabazi yagize ati: “Turi mu bugenzuzi bwo kureba inganda niba zikora inzoga zemewe cyangwa zitatugiraho ingaruka. Hano rero nicyo twahasanze kuko ni inzoga zikorerwamo, icyambere, bari bafite uburenganzira bwo kuzikora. Ni ukuvuga ngo uruganda rurafungwa rukava ahandi rukaza gukoreramo ntitubimenye.”
Yongeraho ati: “Kubera iyo impamvu rero, harimo gukurikiranwa ababigizemo uruhare birumvikana, kubera ko ibintu duha Abanyarwanda ngo banywe bigomba kwemezwa. Iyo bitemejwe ukabikoresha ubizi, uba uzi icyo urimo gukora. Uramutse utabizi ukenga nko murugo abantu bakanywa bakarwara mu nda, abantu bavuga bati ni umwanda, ni amazi mabi,….. Ariko gukora inzoga ugurisha ubizi ko utabyemerewe ukabihisha ukajya no kubigurisha ahandi, birahanirwa kuko ntabwo tuba tuzi ikiba kirimo niba kitagenda ngo cyangize Abanyarwanda.”
Itegeko nº 68/2018 ryo ku wa 30/08/2018 riteganya ibyaha n’ibihano muri rusange mu ngingo ya 132, riteganya ko umuntu ukora, ucuruza, ukwirakwiza cyangwa winjiza mu Gihugu ibiribwa, ibinyobwa, imiti cyangwa ibindi bintu bitujuje ubuziranenge cyangwa bishobora kwangiza ubuzima bw’umuntu, aba akoze icyaha.
