Abaturage bo mu Murenge wa Gasange mu Karere ka Gatsibo bishimiye ko bagejejweho amazi meza kuko bari bamaze igihe bakora ingendo ndende bajya gushaka amazi.
Muri uyu mwaka w’ingengo y’imari wa 2020/2021 nibwo abaturage bo Murenge wa Gasange bashyikirijwe amazi meza n’ubwo ataragera hose, abayabonye baremeza ko ubuzima bwabo bwahindutse.
Urugendo rw’ibilometero bitanu nirwo rugufi abaturage bo mu gasantere ka Gasange bakoraga bagiye gushaka amazi meza, ubuhamya butangwa na bamwe mu baturage bugaragaza uburyo bari babayeho mbere y’uko babona amazi n’uburyo babayeho ubu, Habimana Jean Baptiste ni umwe muri bo, ni umugabo w’imyaka 29 ubusanzwe avoma amazi ku igare akayagurisha.
Yagize ati: “Twavomaga amazi muri Muhazi harimo ibilometero nka bitanu uvuye inaha, mbere twabonaga amazi rimwe na rimwe tukayabona bitugoye, tukanayarara.”
Akimana Marthe avuga ko amazi bayabonye mu kwezi kwa kabiri, nawe ni umwe mu bavomaga muri Muhazi amazi bavuga ko atari meza, yishimiye ko bashyikirijwe amazi.
Yakomeje agira ati: “Twavomaga amazi mabi twaraga ibicurane n’inzoka, ubu batuzaniye amazi meza ntacyo atwaye ntitukirwaragurika.”
Mugarura Emmanuel atuye mu Kagari ka Kigabiro mu Murenge wa Gasange, yagize ati: “Turashimira Perezida wacu Kagame waduhaye iterambere risesuye kandi yijeje abaturage ayobora.”
Umunyamabanga Nshingwabikorwa w’Umurenge wa Gasange Ndayisenga Jean Claude ahamya ko ubuzima bw’abaturage bwahindutse, kuri ubu bakaba bakomeje urugamba rwo kwiteza imbere.
Yagize ati: “Amazi yaje ari igisubizo ubusanzwe umurenge wacu nta mazi wagiraga, amazi yakoreshwaga ni ay’ikiyaga cya Muhazi, abandi bakajya kuyakura mu Murenge wa Muhura, ubu muri buri mudugudu byibura harimo ivomero, aho yashyizwe ni uko nta muturage uzarenza intambwe 500 atabonye ivomero.”
Umuyoboro w’amazi wubatswe uturuka ku isoko yitwa Rwandabarasa ni isoko iri mu Murenge wa Murambi.
