Ubuyobozi bw’Akarere ka Gatsibo burakangurira imiryango kwirinda kuba mu makimbirane n’ubwumvikane buke kuko ariyo ntandaro y’abana bisanga ku mihanda bataye ishuri bitewe n’uko imiryango yabo idashobora kubabonera iby’ibanze bakeneye ngo bakomeze kwiga.
Iyo unyuze mu mujyi wa Kabarore mu saha y’umugoroba usanga abana bato bari mu kigero cy’imyaka icumi na cumi nine bakabaye bari mu ishuri bicaye ku muhanda, bamwe basaba abahisi n’abagenzi, iyo ugerageje kuganira nabo bakubwira ko impamvu batiga ari uko nta bikoresho babona bitewe n’uko bamwe muri ribo ababyeyi babohora mu ntonganya.
Raporo ya Minisiteri y’Uburezi yashyizwe hanze muri Werurwe 2025 igaragaza ko abana bataye ishuri mu mwaka wa mashuri 2023- 2024 mu mashuri abanza banganaga na 5.2%, abataye ishuri mu cyiciro rusange bari 4.1% mugihe mu mashuri y’isumbuye banganaga 4.8%, naho muri rusange abataye ishuri ku rwego rw’Igihugu muri rusange bangana 4.7%.
Umuyobozi w’Akarere ka Gatsibo wungirije ushinzwe imibereho myiza y’abaturage Mukamana Marceline avuga ko Leta ikora ibishoboka byose ngo umwana w’umunyarwanda abashe kwiga, hubakwa ibikorwaremezo n’ibindi byafasha korohereza imyigire y’abana, ariko haracyari ikibazo cy’imiryango usanga ibana mu makimbirane bikaba intandaro y’abana bava mu ishuri.
Aragira ati: “ Iyo urebye mu Karere ka Gatsibo usanga buri kagari byibuze hari ikigo cy’ishuri, hari gahunda yo kugaburira abana ku mashuri, ibyo byose n’ibindi ntavuze ni ibifasha abana mu myigire yabo Leta yagiye ishyiraho, kuba hari abakiva mu ishuri usanga akenshi ari ibibazo biba mu miryango yabo, umugore n’umugabo ntibumvikana, ugasanga barara batongana, barwana bigatuma wa mwana atabona iby’ibanze bimufasha mu myigire ye, ndetse n’ibyo umwana akenera mu mibereho ye ya buri munsi yabona atabibona ashonje akava murugo ikisanga mu muhanda.”
Bamwe mu baturage baganiriye na MUHAZIYACU bemeze ko amakimbirane yo mu ngo agira uruhare runini mu bana bata ishuri, ndetse n’uburere bw’umwana muri rusange.
Kagabo Theoneste, ni umuyobozi w’umudugudu wa Kabingo, mu kagari ka Kabarore, mu Murenge wa Kabarore avuga ko amakimbirane yo mu miryango ariyo nyirabayazana y’abana bata ishuri,
Yagize ati: “Akenshi usanga iyo mu muryango nta mahoro ahari bigira ingaruka ku buzima bw’abana, cyane cyane kuri ya miryango ibana mu buryo butemewe n’amategeko, niho usanga iyo habayemo kutumvikana bigira ingaruka zikomeye cyane ku bana kuko buri wese yikuraho inshingano bigatuma umwana abura amahitamo ugasanga birangiye agiye mu muhanda.”
Nyirahabimana Angelique atuye mu kagari ka Kabarore avuga ko amakimbirane yo mu ngo atabangamira imyigire y’abana gusa ahubwo adindiza n’imibereho isanzwe y’umwana.
Aragira ati: “Amakimbirane mu mu ngo adindiza imibereho n’iterambere ry’umuryango, si ugutuma abana bava mu ishuri gusa kuko iyo murugo hahoramo intonganya, ntawe utekereza umushinga w’iterambere, bigatuma n’umwana wigaga ishuri arivamo kuko ntiyajya kwiga atariye, ntiyakwiga adafite ibikoresho, ibyo byose rero ningaruka ziterwa n’ubwumvikane buke bwo mu miryango.”
Minisitere y’uburezi ifatanyije n’abafatanyabikorwa barimo umuryango wa Education Above All, ndetse na Save the Children Rwanda mu mushinga witwa Zero out of school Children batangije gahunda yo kugarura abana bataye ishuri bagera 173,000 muribo abagera ku bihumbi 64 basubiye kwiga mu mwaka wa mashuri wa 2024-2025.
