Ubuyobozi bw’uruganda Nyagatare Rice Company Ltd rutunganya umuceri uhingwa mu Karere ka Nyagatare bugaragaza ko bakeneye abashoramari baguramo imigabane mu rwego rwo kuzamura umusaruro no kwagura ubushobozi.
Nyagatare Rice Company Ltd itunganya umusaruro w’umuceri ukomoka mu bibaya by’aka Karere kazwiho ubutaka bwera kandi bugari, rukaba rwaratangiye imirimo mu mwaka wa 2010. Rwubatse mu Murenge wa Karangazi mu Karere ka Nyagatare.
Rukoresha ikoranabuhanga rigezweho, rutanga serivisi zirimo gutunganya, gupfunika, no kohereza ku isoko umusaruro w’umuceri ufite ireme rihuye n’ibipimo byo mu Gihugu.
Uru ruganda rukorana n’amakoperative y’abahinzi b’umuceri atanu yo mu Karere ka Nyagatare ariyo MUVUMBA P8 RICE GROWERS, COOPRORIKA, COOPRIMU, CORIVNY na CODERVAM, rukaba rufite ubushobozi bwo gukora toni eshanu ku isaha bingana na toni 80 ku munsi.
Umuyobozi w’uru ruganda rwa Nyagatare Rice company Ltd, Basabira Laurent avuga ko bakeneye ko abashoramari bashya baguramo imigabane mu rwego rwo kwagura isoko rw’umuceri batunganya.
Yagize ati: “Twese dufite amahirwe yo gufatanya mu ishoramari kandi turifuza ko uru ruganda rwagera ku rwego mpuzamahanga. Kugura imigabane ni uburyo bwo kuzamura uruganda ndetse no kunguka ku musaruro w’ishoramari. abashoramari tubahaye ikaze.”
Yakomeje avuga ko uru ruganda uwarushoramo imari atahomba kuko rwunguka bishimishije, ati: “Ni uruganda rwuzuye rutwaye miliyoni 760Frw, ubwo hari muri 2010, uruganda rurunguka cyane kuko mu mwaka ushize twungutse miliyoni zigera kuri 400Frw.”
Nyagatare Rice Company Ltd, ifite abakozi bahoraho 79, hakaba n’abandi bakozi bakora bubyizi mu gihe cy’isarura 180, ndetse rugakorana n’abahinzi b’umuceri mu makoperative atandukanye bagera 5,000.
