Tariki 4 Nyakanga 2020 hazizihizwa Umunsi wo Kwibohora ku nshuro ya 26, ibirori ku rwego rw’igihugu bikazabera mu Murenge wa Tabagwe, mu Karere ka Nyagatare.
Nkuko itangazo rya Minisiteri y’Ubutegetsi bw’Igihugu ryo kuwa 25 Kamena ribigaragaza, buri Karere gafite imishinga migari kazataha kuri uriya mukuru, gusa Nyagatare hari umwihariko w’uko hari imishinga igera ku icumi iherereye mu mirenge ya Tabagwe, Nyagatare, Karama, Gatunda, Musheri na Rwempasha
Mu mishinga izatahwa kuri uriya munsi harimo Sitade ya Nyagatare iherereye mu Mujyi wa Nyagatare izajya yakira abantu barenga 3,500, kuyubaka bikaba byaratwaye agera kuri miliyari 9Frw.
Kuri uyu munsi nibwo ibitaro bya Gatunda, biherereye mu Murenge wa Gatunda bizafungurwa ku mugaragaro.
I Tabagwe aho umunsi mukuru nyirizina uzabera hazatahwa umudugudu w’icyitegererezo, witwa Gishuro IDP Model Village, uteganyijwe guturwamo n’imiryango 64.
Uyu mudugudu uzaba ufite ibikorwaremezo bitandukanye harimo ishuri mbonezamikurire (ECD), poste de sante, igikumba kirimo inka 64, umurima w’ubuhinzi ungana na hegitari 73, umurima w’ubwatsi bw’amatungo, agakiriro ndetse n’inzu y’inkoko irimo inkoko 2,000.
Muri Tabagwe kandi hazatahwa ikigo nderabuzima gishyashya.
Hazatahwa kandi umuhanda wa kaburimbo uturuka Nyagatare mu mujyi ukagera Karama, uwo muhanda unyura muri Tabagwe, ureshya na kirometero 30.8.
Inyubako nshya ku rwunge rw’amashuri rwa GS Tabagwe zarubatswe, harimo aho kurira ndetse n’uburyamo bw’abanyeshuri bataha kure y’ishuri.
Uyu munsi wo Kwibohora kandi uzasiga hatashywe ku mugaragaro amasoko mato ya kijyambere ya Shonga, Kabuga, Rwempasha na Musheri.
