Ubuyobozi bw’Umurenge wa Mukarange mu Karere ka Kayonza, burasaba abaturage gutanga amakuru ku haba hari imibiri itarashyingurwa nyuma y’aho habonetse umubiri w’umuntu bikekwa ko yishwe muri Jenoside yakorewe Abatutsi.
Uyu mubiri wabonetse mu isambu y’umuturage mu Mudugudu wa Iragwe, Akagari ka Nyagatovu kuwa Gatatu tariki ya 14 Ukuboza ubwo yacukuraga ngo ahashyire ikigega.
Umunyamabanga Nshingwabikorwa w’Umurenge wa Mukarange, Patrick Kabandana, yatangarije MUHAZIYACU ko uyu mubiri w’umuntu wabonwe n’uwitwa Uwamahoro Betty w’imyaka 29 wari ugiye kubaka ikigega mu isambu ye.
Amakuru avuga ko uyu muntu yishwe mu 1994, mu gihe cya Jenoside yakorewe Abatutsi ariko Bugingo Theoneste wagurishije Uwamahoro, avuga ko uwo muntu atahigwaga, ko yamumenye agendeye ku myenda yari yambaye.
Gitifu Kabandana yavuze ko aya makuru ashidikanywaho, avuga ikiri gukorwa.
Ati ” Habonetse umubiri, ni ukuwukura aho wabonetse ukajyanwa mu biro by’ubuyobozi. Iyo amakuru atangwa n’abo tuhasanze ashidikanywaho, hari itsinda rikomeza gushakisha amakuru y’inyongera ririmo na IBUKA ku rwego rw’umurenge n’akarere.”
Ku ngingo yo gutanga amakuru, yakomeje ati: “Amakuru aratangwa mu buzima busanzwe nta kibazo. Birashoboka ko abahinze hariya hantu batigeze bagera ahari uriya mubiri. Ni umuntu umwe uvuga ko atari mu bahigwaga ariko ntitwabihamya. Ahantu hatuye abantu benshi bari banahatuye, ntitwavuga ko ari we wenyine wari umuzi gusa.”
Uyu muyobozi yashimiye Uwamahoro Betty watanze amakuru, asaba n’abandi kuyatanga igihe babonye umubiri w’umuntu.
Yagize ati” Twishimira umuturage watanze amakuru. Tunashishikariza n’abandi kuyatanga igihe bahuye na case nk’iriya. Biranashoboka ko hari imibiri y’abantu benshi cyane cyane Abatutsi bishwe muri Jenoside yakorewe Abatutsi mu 1994, itaraboneka, hagakorwa ubushakashatsi niba yarahigwaga cyangwa atarahigwaga, byadufasha kuko niyo gahunda Leta yacu ishyigikiye.”
Isambu y’umuturage yasanzwemo uwo mubiri w’umuntu yaguzwe na Uwamahoro Betty mu myaka ine ishize. Yayiguze na Bugingo Theoneste w’imyaka 60 ariko yahoze ihingwa na Mwitizina Samuel w’imyaka 48 na Twahirwa Alphred ufite 41.
Kuri ubu umubiri washyizwe ku Kagari ka Nyagatovu mu gihe hagishakishwa andi makuru.
