Ku bufatanye bw’Akarere ka Bugesera, inzego z’umutekano ndetse n’itsinda ryo ku rwego rw’Igihugu rishinzwe gukora ubugenzuzi bw’inganda zikora ibinyobwa bisembuye, basanze uruganda SKY Drop Industries Ltd ruherereye Kanzenze mu Murenge wa Ntarama rwenga inzoga zitemewe ndetse rutunze n’ibinyabutabire byarengeje igihe cyo gukoreshwa, birangizwa’ ndetse ruranafungwa.
Igikorwa cyo kangiza izi nzoga ndetse no gutwara ibinyabutabire byarengeje igihe ngo bijyanwe mu kimoteri rusange cya Nduba, cyaye kuri uyu wa Gatatu tariki 29 Nyakanga 2026.
Bimwe mu byangijwe, harimo imifuka 461 y’isukari yarengeje igihe, litiro 960 z’ibisukika ndetse n’ibindi binyabutabire bihindura impumuro (flavours) byarengeje igihe.
Umuyobozi w’Akarere ka Bugesera wungirije ushinzwe iterambere ry’ubukungu, Umwali Angelique yavuze ko ubu bugenzuzi bugamije kurinda ubuzima bw’abaturage no gukumira ko ibicuruzwa bitujuje ubuziranenge bijya ku isoko.
Yagaragaje kandi ko ibyasanzwe muri uru ruganda byangijwe ndetse n’ibindi byarangije igihe cyo gukoreshwa byajyanwe i Nduba mu kimoteri rusange, ati: “Hari ibitujuje ubuziranenge bisukika ndetse n’iby’amasukari byarengeje igihe nabyo bigomba kujyanwa ahabuhenewe, icyo nicyo gitumye tuza hano gukora ubwo bugenzuzi. Ibyo twangirije ahangaha rero ni ibisukika, ibindi by’amafu dufite imodoka zabitwaye n’ababiherekeza bakabijyana mu kimoteri cya Nduba kuko niho bakira ibyo bintu.”
Ikigo cy’Igihugu gishinzwe ubuziranenge bw’ibiribwa n’imiti-Rwanda FDA, kivuga ko gukurikirana inganda n’ahakorerwa ibiribwa n’ibinyobwa ari kimwe mu bikorwa bihoraho bigamije kurengera ubuzima bw’abaguzi no gukumira ikwirakwira ry’ibicuruzwa bitujuje ubuziranenge.
Mu ntangiriro z’uyu mwaka kandi, Akarere ka Bugesera kabaye kamwe mu twibasiwe n’ingaruka z’inzoga zitemewe, aho ibinyobwa bwateye impfu n’uburwayi mu Murenge wa Ngeruka, bituma inzego z’ubuzima, iz’umutekano na Rwanda FDA zongera ubukangurambaga n’igenzura ry’inzoga zicuruzwa.
Mu Gihugu hose, ikibazo cy’inzoga zitujuje ubuziranenge gikomeje kwitabwaho n’inzego zibishinzwe.
Raporo ya Rwanda FDA kandi igaragaza ko hagati ya Ukwakira 2024 na Werurwe 2025, ubugenzuzi bwakozwe bwafashe litiro 60,176 z’inzoga zitujuje ubuziranenge zakozwe mu nganda zitari zemewe n’amategeko, ndetse hagaragazwa ko hari n’izindi nganda zafatanywe ibikorwa binyuranyije n’amabwiriza.
