Umusore witwa Tuyisenge Cassien wo mu Karere ka Ngoma avuga ko Icyorezo cya Covid-19 cyatumye atangira gukora ibihangano by’imitako n’ibindi bikoresho by’ubugeni, ubu bikaba bimwinjiriza amafaranga ashobora kugera ku bihumbi 200 Frw mu kwezi; akabibonamo icyizere cy’ubukire.
Uyu musore w’imyaka 26 y’amavuko, imitako akora ayikorera mu Murenge wa Kibungo, mu isantere y’ahazwi nka Rompuwe, hafi ya Sitade ya Ngoma, kuva mu kwezi kwa Gicurasi 2020 ubwo Icyorezo cya Covid-19 cyari kimaze amezi abiri kigeze mu Rwanda.
Mu kiganiro MUHAZIYACU yagiranye na Tuyisenge Cassien, yasobanuye uburyo gutangira gukora iyo mitako atari yarigeze abitekerezaho mbere, ahubwo ngo ari ibintu yatekerejeho agatangira guhita abishyira mu bikorwa mu gihe cya ‘Guma murugo’ igihe ibikorwa yakoraga byo gucuranga mu birori byari byarahagaritswe mu rwego rwo kwirinda icyorezo,
Yagize ati: “Ibura ry’akazi ryari rihari, icyo gihe twari muri ‘Guma murugo’ nibwo narebye ibintu binyegereye mbona nabibyaza umusaruro. Nafashe bimwe mu bintu bikoreshwa bikajugunywa nk’imiheha, imishito, imyenda ishaje,…kandi nta gishoro byansabye uretse gutekereza gusa, ibyo ntekereje nkabishyira mu ngiro. Mbese nahereye kuri bimwe mu bintu bikoreshwa rimwe bikajugunywa mba ari byo mperaho nkora bino bintu by’imitako.”
Tuyisenge avuga ko nubwo yakuze akunda ibintu by’ubugeni, mbere atari azi kubikora gusa ngo ‘nyuma yo kubona ko ndi gupfa ubusa muri Guma mu rugo, nibwo natangiye kubikora’
Yakomeje agira ati: “Ntangiye kubikora rero nibwo nabonye ko bishoboka, hanyuma nkajya nsura abasanzwe babikora, ariko ubu byarankundiye.”
Ubu umutako mwiza mu yo uyu musore akora, uhenze awugurisha amafaranga y’u Rwanda ibihumbi 200, mu gihe umutako uhendutse mu yo akora ugura 3000Frw.
Kugeza ubu nk’uko ibikorwa bijyanye n’ubugeni n’ubuhanzi Tuyisenge akorera i Kibungo yabitangije mu bihe u Rwanda n’isi muri rusange byari byugarijwe n’Icyorezo cya Covid-19 kugeza n’ubu, uburyo akoresha mu kumenyekanisha no gucuruza ibihangano bye ni ubw’ikoranabuhanga kuri zimwe mu mbuga nkoranyambaga
Yagize ati:”Ibi bintu aho natangiriye kubikorera ubu nibyo navuga ko bintunze kuko bimpa amafaranga yo kwibeshaho.”
Abenshi mu bagura imitako ya Tuyisenge ngo ni abo mu Mujyi wa Kigali, Rwamagana na Kayonza.
Imbogamizi Tuyisenge Cassien avuga ko afite kugeza ubu zirimo kuba abantu benshi bo mu gace atuye anakoreramo batarasobanukirwa icyo imitako imaze no kubura isoko. Gusa ngo ibyo ntibimuca intege, ahubwo akomeza gushyira imbaraga mu gukundisha abantu ibyo akora abumvisha akamaro ka byo, no kurushaho kunoza no guhanga udushya mu bihangano bye; ku buryo birushaho gukundwa.
uyu musore ararenze ahubwo , courage bro.