Abasenateri bagize Komisiyo y’Iterambere ry’Ubukungu n’Imari muri Sena basabye ubuyobozi bw’uruganda rwa Ngoma Tomato Processing Plant (NTPP) kunoza uburyo bwo kwishyura abahinzi b’inyanya ku gihe, bagaragaza ko kubishyura hakiri kare ari imwe mu nzira zizabafasha kongera umusaruro no kwiteza imbere.
Ibi babigarutseho ku wa 29 Nyakanga 2026, nyuma y’uruzinduko rw’akazi Abasenateri batatu bayobowe na Senateri Nsengiyumva Fulgence, Perezida wa Komisiyo y’Iterambere ry’Ubukungu n’Imari muri Sena, bagiriye mu Karere ka Ngoma mu rwego rwo kugenzura ishyirwa mu bikorwa rya gahunda za Guverinoma zigamije kugeza amashanyarazi ku baturage no kureba uruhare rwayo mu guteza imbere ubukungu.
Mu ruzinduko rwabo, basuye uruganda rwa Ngoma Tomato Processing Plant (NTPP), rugiye gutangira gutunganya ibikomoka ku nyanya, bagirana ibiganiro n’abahinzi baryoherereza umusaruro.
Abahinzi bagaragaje ko uru ruganda rwabazaniye isoko ryizewe, ariko basaba ko rwajya rubishyura ku gihe kugira ngo babashe gukomeza ibikorwa byabo by’ubuhinzi; kuko ngo hari ubwo rutwara umusaruro wabo bakabara hagati y’ibyumweru bibiri n’ukwezi batarabona amafaranga yabo.
Umuhinzi w’inyanya Habamungu Justin yavuze ko mbere y’uko uru ruganda rwubakwa, inyanya nyinshi zangirikaga kubera kubura isoko.
Yagize ati: “Ndi umuhinzi w’inyanya kandi mbimazemo igihe, ubundi tutarabona uru ruganda, umusaruro wacu warangirikaga kuko inyanya ntabwo zibikwa, twaburaga aho tuzishyira zikangirika, gusa ubu bimeze neza kandi turishimye. Turifuza ko bajya batwishyurira igihe, kandi ku giciro kiza kuko natwe tuba twahenzwe mu kugura imiti. Iyo batwishyuye batinze bituma tudakoresha neza amafaranga yacu.”
Hakizamungu Elias, yavuze ko uru ruganda ruzafasha gukemura ikibazo cy’igihombo baterwaga no kubura isoko, ariko agaragaza ko gutinda kwishyurwa bikibabangamiye.
Yagize ati: “Ndi umuhinzi mworozi, ni byiza cyane ko twabonye uruganda, hari umusaruro wacu wapfaga ubusa ariko ubu kuba dufite uruganda ntabwo bizongera kwangirika. Imbogamizi duhura nazo kugeza ubu ni uko hari igihe batinda guhita bishyura kandi tuba twakoresheje abakozi batandukanye bagiye bahita batwishyura vuba natwe twakwiteza imbere mu buryo bugaragara.”
Umuyobozi Mukuru wa Afrinet Solutions, ari na yo yashoye imari muri uyu mushinga, Biziyaremye Dieudonne, yavuze ko bamaze gutegura uburyo buzafasha abahinzi kubona amafaranga yabo badategereje igihe uruganda ruzishyurira.
Yagize ati: “Umushinga wacu ugamije gutunganya ibikomoka ku nyanya, ubu dufitanye amasezerano n’ibigo by’imari bizajya biha amafaranga abahinzi ku buryo bazajya bahabwa amafaranga mbere, mu gihe batarabona ayo uruganda rwabishyuye, nyuma yaho uruganda rukazajya rubafasha kwishyura. Hari n’ibindi bigo dufite kuri ubu bizajya bibaha amafaranga bakigurirwa umusaruro. Abahinzi turabasaba kongera ingano y’umusaruro kugira ngo bazabashe guhaza uruganda.”
Nyuma yo kumva ibibazo by’abahinzi n’ibisobanuro by’ubuyobozi bw’uruganda, Senateri Nsengiyumva Fulgence yavuze ko ikibazo cyo gutinda kwishyura kigomba gukemurwa, kugira ngo uru ruganda ruzagire uruhare rugaragara mu guteza imbere abahinzi.
Yagize ati: “Ikigomba gukemuka ni ukugurira umusaruro abahinzi, kandi umusaruro ukagurwa atari uko bawubonye, ahubwo bakubahiriza amasezerano n’abahinzi kuko bazabagurira umusaruro. Ikindi dushima twabonye hano hari amabanki bazakorana nayo, ku buryo abahinzi bashatse n’inguzanyo yo kongera umusaruro bahita bayihabwa vuba, ku buryo batazagira igihombo.”
Uru ruganda rwitezweho guha isoko rihamye abahinzi b’inyanya no kongera agaciro k’umusaruro wabo. Ruzajya rutunganya ibicuruzwa bitandukanye birimo Tomato Paste, Jus y’inyanya, Tomato Ketchup, Tomato Sauce, Mayonnaise, Hot Sauce, Pizza Sauce na Mosar.
Kugeza ubu, Ngoma Tomato Processing Plant yamaze gusinyana amasezerano n’amakoperative 24 y’abahinzi bo mu turere turindwi tw’Intara y’Iburasirazuba, amatsinda abiri y’abahinzi ndetse n’abahinzi ku giti cyabo bagera kuri 30, bose hamwe bakaba ari abasaga 1,500.
Biteganyijwe kandi ko uru ruganda ruzatanga akazi gahoraho ku bantu barenga 50, rukaba rwitezweho guteza imbere ubuhinzi bw’inyanya n’ubukungu bw’abaturage bo mu Burasirazuba.
