Guverinoma y’u Rwanda yamaganye icyemezo cya Leta ya Canada ku bibazo by’intambara yo mu burasirazuba bwa Repubulika Iharanira Demokarasi ya Congo (RDC), ivuga ko ari ukwikoma u Rwanda bidafite ishingiro kandi ndetse ari ibintu biteye isoni.
Mu itangazo ryashyizwe ahagaragara na Minisiteri y’Ububanyi n’Amahanga n’Ubutwererane y’u Rwanda, u Rwanda rwatangaje ko rutishimiye imyanzuro yafashwe na Canada, cyane cyane kuba yashinjije u Rwanda kugira uruhare mu bikorwa by’ubugizi bwa nabi bikorerwa muri Congo.
U Rwanda rwagaragaje ko rutazihanganira ibi birego kandi ruzasaba ibisobanuro Leta ya Canada.
Minisiteri y’Ububanyi n’Amahanga y’u Rwanda yagize iti: “U Rwanda rwasomye itangazo rya Global Affairs Canada ku kibazo cy’uburasirazuba bwa RDC, rusanga ari uguharabika no gushinja u Rwanda ibinyoma bidafite ishingiro. Tuzabisabaho ibisobanuro.”
U Rwanda rwagaragaje ko Canada idashobora kuvuga ko ishyigikiye intambwe zafashwe n’inzego z’akarere mu nzira y’amahoro, mu gihe ihitamo gushyira ibyaha byose ku Rwanda aho kugaragaza uruhare rwa Leta ya RDC.
Rwagaragaje ko ibi bidatanga umuti ku kibazo, ahubwo bipfukirana ukuri, ndetse bigaha umurindi ibikorwa byo kugirira nabi abasivili bo muri Kivu y’amajyepfo.
Iti: “Canada ntishobora kuvuga ko ishyigikiye amahoro mu gihe itareba uruhare rwa Leta ya RDC mu bibazo bikomeje kwibasira abasivili, by’umwihariko ibitero by’ingabo za FARDC zifatanyije na FDLR na Wazalendo ku baturage b’abanyamulenge,”.
Minisiteri y’Ububanyi n’Amahanga ya Canada yari yatangaje ko yafashe ingamba zo guhana u Rwanda, ndetse inatumiza Ambasaderi w’u Rwanda muri Canada, Prosper Higiro, kugira ngo imugezeho ibyo birego. Icyakora, Guverinoma y’u Rwanda yavuze ko izo ngamba nta cyo zizafasha mu gukemura ikibazo cy’uburasirazuba bwa RDC, ahubwo ko izakomeza gukorana n’ibihugu byo mu karere mu gushakira umuti iki kibazo mu buryo bwa dipolomasi.
“Ingamba zafashwe na Canada ntizizakemura ikibazo. U Rwanda ruzakomeza gukorana n’akarere ku biganiro by’ubuhuza biyobowe na Afurika, mu gihe rubungabunga umutekano warwo.”
Intambara yo mu burasirazuba bwa RDC yatangiye mu Ugushyingo 2021 nyuma y’uko Leta ya RDC yanze kubahiriza amasezerano yagiranye n’umutwe wa M23.
Kugeza ubu Leta ya Congo ivuga ko u Rwanda arirwo rwayiteye rubinyujije mu gakingirizo ka M23. Ibihugu bitandukanye birimo ibyo mu burengerazuba bw’isi bikomeje kugenda bifatirwa u Rwanda ndetse n’abayobozi bakuru barwo ibihano ibindi bigahitamo guhagarika amasezerano y’ubufatanye hagati y’ibihugu byombi.
