Ikigo cyita ku bana bakurwa ku mihanda SACCA gikorera mu Karere ka Kayonza, cyahaye ibikoresho by’ishuri abanyeshuri 174 barimo 21 babyaye imburagihe basubiye mu ishuri.
Ni igikorwa cyabaye mu ntangiriro z’iki cyumweru aho abanyeshuri 65 biga mu mashuri yisumbuye bahawe ibikoresho ndetse n’abandi 109 biga mu mashuri abanza.
Umuyobozi mukuru wa SACCA, Mukamuyenzi Valentine yabwiye MUHAZIYACU ko aba banyeshuri bahawe ibikoresho kugira ngo bibafashe mu gutangira ishuri neza.
Ati “Twabahaye amakaye, imyenda y’ishuri, ibikoresho by‘isuku, ibiryamirwa ku bagiye gutangira mu mwaka wa mbere n’umwaka wa kane ndetse tukongeraho n’amafaranga y’ishuri.”
Ati “Nkuko Leta yacu ihora ibidushishikariza bakwiriye gusubira mu ishuri nta n’umwe usigaye inyuma cyangwa ngo ahezwe ari nayo mpamvu mu cyiciro cyacu cy’abiga imyuga twibanda ku bataragize amahirwe yo gukomeza ishuri ku mpamvu runaka.”
Yavuze ko mu banyeshuri 174 bahawe ibikoresho ngo basubira mu ishuri harimo abakobwa 21 babyariye mu rugo nabo bahawe ibikoresho kugira ngo basubire mu ishuri.
SACCA ivuga ko izakomeza gushyigikira uburezi bw’abana binyuze mu kubatera inkunga nka ngo bige ngo kuko aribwo buryo bwabafasha mu gutera imbere.
Ikigo cya SACCA kuri ubu kimaze gufasha abana barenga 10,000 biganjemo abagiye bakurwa ku mihanda, kuri ubu iki kigo cyashyize imbaraga muri gahunda yo gufasha imiryango itishoboye aho imwe n’imwe yubakirwa inzu indi igahabwa ubufasha bw’ibanze mu kurinda abana bayikomokamo kujya mu buzima bwo mu muhanda.
Kuri ubu kandi banatangije gahunda yo kwita ku bangavu batewe inda imburagihe aho bamwe basubijwe mu ishuri abandi barihirirwa mu myuga abana babo bagasigaranwa n’iki kigo.
