Urwego rw’Igihugu cy’ubugenzacyaha-RIB rwatangaje ko rwataye muri yombi abantu 10 barimo n’abakora mu rwego rw’ubutabera bakekwaho icyaha cyo gusaba, kwakira no gutanga indonke.
Nk’uko RIB yabitangaje mu ijoro ryo kuri uyu wa 21 Gicurasi, abatawe muri yombi bafunzwe tariki 16 Gicurasi 2024, barimo Umucamanza ku Rukiko rw’Ibanze rwa Gasabo, Umushinjacyaha ku Rwego rw’Ibanze rwa Ngarama mu Karere ka Gatsibo, Umuhesha w’Inkiko w’Umwuga, Abagenzacyaha 2 bakorera kuri Station ya RIB ya Ngarama mu Karere ka Gatsibo, n’abantu batatu biyise Abakomisiyoneri bakoreraga muri Santere ya Ngarama, mu Karere ka Gatsibo; ndetse n’abaturage babiri bari bafite abantu babo bafunze.
RIB yatangaje ko abo batawe muri yombi ubu “bafungiwe kuri Sitasiyo za RIB za Nyarugenge, Kicukiro, Nyamirambo, Kimihurura, Kimironko na Remera mu gihe dosiye zabo ziri gutunganywa kugira ngo zishyikirizwe Ubushinjacyaha”.
Yatangaje kandi ko abo bafunzwe nyuma y’uko hari hashize iminsi bakorwaho iperereza ku cyaha bakekwaho cyo gusaba, kwakira no gutanga indonke.
Abakora mu butabera ngo bari barubatse uburyo bazajya bakamo abantu indonke bishingiye ku birego bari gukurikiranwaho, haba mu Ubugenzacyaha, Ubushinjacyaha ndetse no mu Rukiko.
RIB yakomeje igira iti: “Ibi babikoraga bifashishije Abakomisiyoneri bakoraga nk’abahuza babo n’abantu bafite ababo bafunzwe cyangwa bari gukurikiranwa. Ikigereranyo cy’amafaranga bakiraga kuri buri dosiye ni ibihumbi 200 Frw.”
“Urugero, iperereza ryagaragaje ko mu matariki atandukanye y’Ukwezi kwa Mata, hari dosiye zigera kuri eshanu, zakiriwemo indonke ngo abantu bagombaga gufungwa ngo bafungurwe n’abagomba gufungurwa ngo bakomeze gufungwe. Ibi bikorwa by’abo bantu bakekwa byagaragaye mu byaha byo gukubita no gukomeretsa, mu bujura, gusambanya abana, kutambamira cyangwa gutesha agaciro icyemezo cy’ubutabera.”
RIB itangaza ko icyaha bakurikiranweho cyo kwaka cyangwa kwakira indonke bikozwe n’ufata ibyemezo by’ubutabera cyangwa ubishyira mu bikorwa, giteganwa n’ingingo ya 5 y’itegeko N°54/2018 ryo ku wa 13/08/2018 ryerekeye kurwanya ruswa.
Iyi ngingo ya 5 y’iryo tegeko ivuga ko Umucamanza wahamijwe n’Urukiko icyaha cyo kwakira cyangwa gusaba indonke, ahanishwa igifungo kitari munsi y’imyaka icumi (10) ariko kitarenze imyaka cumi n’ibiri (12) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse.
Naho Umushinjacyaha, Umuhesha w’inkiko cyangwa Umugenzacyaha wasabye cyangwa wakiriye indonke, iyo abihamijwe n’urukiko, ahanishwa igifungo kuva ku myaka irindwi(7) ariko kitarenze imyaka 10 n’ihazabu y’amafaranga y’u Rwanda yikubye inshuro kuva kuri 3-5 z’agaciro k’indonke yasabye, yakiriye cyangwa yasezeranyijwe.
Abaturage babiri bari bafite abantu babo bafunzebo bahamwe n’icyaha, bahanwa bahanwa n’ Ingingo ya 4 y’itegeko N°54/2018 ryo ku wa 13/08/2018 ryerekeye kurwanya ruswa; iteganya ko ubihamijwe n’urukiko, ahanishwa igifungo kuva ku myaka itanu(5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri 3-5 z’agaciro k’indonke batanze.
Mu butumwa RIB itanga, ishimira abaturage bakomeje gutanga amakuru ndetse n’izindi nzego ziyifasha mu urugamba rwo kurwanya icyaha cya ruswa. Igakangurira abantu bose kwirinda gutanga amafaranga cyangwa ikindi kintu cyose bagura serivisi bafitiye uburenganzira cyangwa ngo hakorwe ibinyuranyije n’amategeko.
RIB kandi iraburira abantu bishora mu byaha bya ruswa; ko ubushake, ubumenyi, ubushobozi ndetse n’ubufatanye n’abaturage buhari; ko icyiza bazibukira bakabivamo kuko ntaho bazacikira ukubuko k’ubutabera.
