Abaturage bari batuye ahagiye gukorerwa n’umushinga wa “Gabiro Agro business Hub’ ukora ibikorwa by’ubuhinzi n’ubworozi mu karere ka Nyagatare, batujwe mu Mudugudu w’icyitegererezo wiswe ‘Shimwa Paul’ banahabwa ibyangombwa nkenerwa byose.
Ni imiryango igera kuri 72 igizwe n’abantu 312 yimuwe ijya gutuzwa mu Kagari ka Nyamirama mu mudugudu wa Nkoma ya 2, izi nzu bakaba bazitashye kuri uyu wa Kabiri tariki ya 14 Gashyantare.
Inzu bahawe buri imwe ifite ibyumba bitatu, uruganiriro, ubwogero n’ubwoherero byo mu nzu. Basanzemo kandi ibitanda, matela, ibikoresho byo mu nzu byose n’iby’isuku.
Uwizeyimana Chantal wahawe inzu, yashimye uburyo ubuyobozi bwabitayeho bukabaha inzu nziza.
Yagize ati: “Nabaga mu nzu y’ibinonko none dore bampaye inzu nziza ntabona ubushobozi bwo kwiyubakira, njyewe byandenze inzu irimo umuriro n’amazi? Byandenze pe!”
Nsengiyumva Elie na we wahawe inzu, aragaruka ahantu ku buzima bubi bari babayemo.
Yagize ati: “Ahantu twari dutuye hari habi tuvoma ibiziba nta muriro twagiraga, abana bacu biga kure. None reba nawe inzu baduhaye,amazi ari mu nzu ndakanda ku gikuta umuriro ukaka,ibi ni uguha agaciro Umuturage.”
Umuyobozi w’Intara y’Iburasirazuba CG Gasana K. Emmanuel yavuzeko ibi ari imiyobore myiza no gushyashyanira umuturage.
Yagize ati: “Ibi ni ikimenyetso cy’imiyoborere myiza ya Nyakubahwa Perezida wa Repubulika Paul Kagame uhora ashakira imibereho myiza abanyarwanda, ni na gahunda yo gutuza abantu mu midugudu, ni byiza rero ko mubana neza muri uyu mudugudu mukirinda icyaha kandi mukita kuri izi nzu muhawe mwirinda ko yakwangirika.”
Usibye uyu mudugudu wubatswe ahitwa Shimwa Paul, hari n’iyindi yamaze kuzura nayo izatuzwamo abaturage nabo bimuwe aho uyu mushinga “Gabiro Agro business Hub” uzakorera nka Rwabiharamba na Akayange nayo yo mu Murenge wa Karangazi, buri mudugudu ukazatuzwamo imiryango 120.
