Ubuyobozi bw’Akarere ka Nyagatare buravuga ko bufitiye icyizere aborozi ko bazabasha guhaza uruganda rw’amata y’ifu rwa miliyari 45 Frw rugiye kuzura muri aka Karere, ku bijyanye n’umukamo uzakenerwa.
Ibi Umuyobozi w’Akarere ka Nyagatare Gasana Stephen yabivuze ubwo basuraga uru ruganda ngo barebe aho imirimo yo kurwubaka igeze.
Uru ruganda rwatangiye kubakwa mu Ukwakira 2021 rwubatswe mu Murenge wa Nyagatare mu cyanya cyahariwe inganda cya Rutaraka, rukaba ruzuzura rutwaye miliyari 45 Frw rutangire gukora rwakira litiro ibihumbi 650 ku munsi zirimo litiro ibihumbi 500 zagenewe gukorwamo amata y’ifu naho izindi ibihumbi 150 zikorwemo ibindi bisanzwe bikorwa n’uru ruganda.
Ubwo yaganiraga na MUHAZIYACU Meya Gasana yavuze ko hari byinshi aborozi bamaze kungukira mu nama bagenda bagirana n’ubuyobozi n’uburyo bagenda babyumva ndetse na za nkunganire Leta igenda ishyira mu borozi zibazamurira icyizere cyo kongera umukamo.
Yagize ati: ”Icyizere turagifite gishingiye uko aborozi bagenda bahindura imyumvire ku bworozi, ikindi ni ukuntu ikigo cy’Igihugu gishinzwe ubuhinzi n’ubworozi mu ishami ryacyo rishinzwe imishinga, bagiye kuduha ibikoresho bikoreshwa mu bworozi, tuzashyiramo nkunganire ya 50%, aha ni ku ruhare rw’aborozi n’amakoperative yabo.”
Meya Gasana yakomeje agira ati: “Ikindi kiduha icyizere ni ku ruhare rw’inzego za Leta bari kuduha imbuto z’ubwatsi, amafaranga ya nkunganire ngo aborozi babone amazi n’Inyange ubwayo bazanye abahanga bazajya basura aborozi bakabagira inama mu bworozi bwabo bakora uko umukamo wakwiyongera, izi nama zose nibazubahiriza birumvikana ko ruriya ruganda tuzaruhaza.”
Bamwe mu borozi nabo bavuga ko biyemeje kwagura ubworozi bwabo bakanorora kinyamwuga kugira ngo bongere umusaruro w’amata kuko ibikenewe byose Leta iri kubibaha.
Nkubana Mike wororera mu Murenge wa Katabagemu yavuze ko kuba uru ruganda rwarubatswe mu Karere ka Nyagatare abaruzanye bari babizeye mu kuruhaza.
Yagize ati: ”Abarwubatse muri Nyagatare nuko bari bizeye ubworozi bwacu bityo dufatanije na Leta nk’uko ahantu hose bari kuduhamo nkunganire, mu bwatsi, amazi ibikoresho bindi by’ubworozi natwe icyo dusabwa ni ukumvira inama ubuyobozi butugira tukazishyira mu bikorwa.”
Murungi Janet wororera ahitwa Akayange mu Murenge wa Karangazi we yavuze ko imbaraga Leta yashyize mu borozi bizabafasha kongera umukamo.
Yagize: “Leta yashyize imbaraga mu bworozi bigaragazwa na nkunganire igenda iduha, inama bahora batugira zo guhindura ubworozi tukava kuri gakondo tukajya kukorora bigezweho bya kijyambere, bizadufasha kuzamura umukamo maze ruriya ruganda rwubatswe Rutaraka turuhe umusaruro w’amata ruzakenera.”
Uruganda rw’amata ruri kubakwa na Inyange Ltd mu karere ka Nyagatare ruzajya rwakira amata angana na litiro ibihumbi 650. Kuri ubu imirimo yo kubaka uru ruganda igeze ku musozo aho bari gufungamo imashini no gukora imirimo ya nyuma.
