Akarere ka Ngoma kagaragaza ko kafashe icyemezo cyo kwita ku bihingwa by’inanasi n’urutoki bikaba ari byo kamenyekanaho ku buhinzi bukozwe kinyamwuga butanga umusaruro mwiza kandi mwinshi ku rwego rw’Igihugu; ku mpamvu z’uko ari byo kazwiho kurusha ibindi.
Banamwana Bernard Perezida w’Inama Njyanama y’Akarere ka Ngoma yabwiye MUHAZIYACU ko ari kimwe mu byemezo byafatiwe mu mwiherero w’Inama Njyanama wabaye muri Nzeri 2022 aho bemeje ko Ngoma igomba kugira ibintu bitatu biyiranga hemezwa urutoki, inanasi, icya gatatu kikaba ubukerarugendo.
Avuga impamvu bahisemo inanasi n’urutoki nk’ibihingwa ndangakarere yagize ati: “Iyo uvuze igitoki abantu benshi bumva i Ngoma, wavuga inanasi ndumva nahamya y’uko nta bantu baturusha inanasi mu Rwanda zaba mu bwinshi no mu bwiza. Ibyo byose rero twarabibonye turavuga ngo niba ari ibintu twihariyeho turusha abandi nk’Akarere ka Ngoma kuki tutabigira ibihingwa bibiri ndangakarere, niba ushaka inanasi nziza ukayibariza i Ngoma niba ushaka igitoki cyiza ukakibariza i Ngoma.”
Mu mirenge 14 igize Akarere ka Ngoma ubuhinzi bw’inanasi bukorerwa cyane mu mirenge ya Mugesera, Sake na Zaza aho byemezwa ko ubuso buhinzweho inanasi bubarirwa muri hegitari 6000.
Mu gihe urutoki ruhinzwe kuri hegitari 8,833; aho mu bihe bitandukanye abahinzi b’urutoki babwiye MUHAZIYACU ko rwabateje imbere. Ikigeraranyo cy’umusaruro w’ibitoki uboneka ni toni ziri hagati ya 16 na 26 kuri hegitari.
Kugira inanasi n’urutoki ibihingwa ndangakarere ka Ngoma byitezweho kuvugurura imihingire no gukemura ikibazo cy’umusaruro wabaga mwinshi ukangirika.
Mukarugira Antoinette ni umuhinzi wo muri Koperative KOABANAMU ihinga inanasi ku buso bugera kuri hagitari 4000 mu Murenge wa Mugesera yagize: “Inanasi inaha zadufashije gutera imbere iyo zeze njye mu cyumweru nshobora kugurisha nka toni n’igice, inanasi imwe iba igura hagati ya 300Frw na 500Frw ariko tujya tugira imbogamizi zo kubura isoko, umusaruro ukaba mwinshi ukangirika, ariko kuba hari kubakwa uruganda byaradushimishije, umusaruro uzajya ugerayo utangiritse.”
Banamwana Bernard Perezida w’inama Njyanama y’Akarere ka Ngoma agaragaza ko kuba mu Murenge wa Mugesera hari umushoramari uri kubaka uruganda rutunganya inanasi biteganyijwe ko ruzatangira gukora muri Werurwe 2023, biri mu mujyo wo kwita ku buhinzi bw’inanasi bukanozwa kandi bugateza imbere ababukora birushijeho.
Ati: “Byemezwa ko hafi 40% by’umusaruro w’inanasi wabonekaga wasaga nk’aho upfa ubusa cyangwa ukangirika, ahanini wangirikiraga mu nzira gahati yo kumara gusarura no kugeza umusaruro ku isoko, ubu rero icyiza gihari ni uko inanasi zizajya zisarurwa zijya ku ruganda, izindi zisigaye zijye ku isoko risanzwe. Koperative y’abahinzi b’i Mugesera basanzwe bakorana n’uruganda rw’ Inyange n’izindi bajyana ku yandi masoko atandukanye.”
Biteganyijwe ko uruganda rw’inanasi ruri mu mushinga witwa ‘Izuba Agro-tourism’ ruzaba rufite ubushobozi bwo gutunganya toni 100 ku munsi zongererwe agaciro.
Amakuru MUHAZIYACU ikesha ishami ry’ubuhinzi n’ubworozi mu Karere ka Ngoma ni uko biteganyijwe ko bitarenze Werurwe 2023 muri buri murenge hazaba bamaze gushingwa koperative y’abahinzi b’urutoki bazajya bakora ubuhinzi kinyamwuga, hakanagenzurwa imihingire y’urutoki mu bice byose bigakorwa mu buryo bw’umwuga.
Ku ngingo yo kuba hatekerezwa no gushyirwaho n’inganda zitunganya umusaruro w’urutoki, Banamwana yagize ati: “Tugomba gutangira kuvugurura urutoki kandi bikajyana no gutekereza ngo wa musaruro uri buze kwiyongera uraza kujya hehe, ni yo mpamvu ubwo mu gihe kiri imbere ntituzatangazwe n’uko twabona hari undi mushoramari noneho we waje mu rutoki. Kuko ntabwo burya umuntu yatekereza gushora imari cyane cyane mu byo kongerera agaciro ibihingwa atabona ko hari umusaruro uhagije kandi mwiza.”
Mu rwego rwo kuzamura ubuhinzi, mu ishoramari riri gukorerwa mu Karere ka Ngoma uretse urwo ruganda rutunganya inanasi ruri kubakwa mu Murenge wa Mugesera, hari n’umushinga wa Kampani yitwa ‘GIFT Rwanda Ltd’ uzakora imbuto zitarwara[Virus and disease free] z’urutoki, ibinyomoro,inkeri,inanasi, ruzanakora imbuto z’imigano, ruzuzura rufite ubushobozi bwo gutubura imbuto miliyoni eshatu ku mwaka, uwo mushinga uzaba unafite Lobatwari zipima imbuto, ubutaka, amazi n’amababi; ibikorwaremezo byawo byatangiye kubakwa mu Kagari ka Nyagatugunda, mu Murenge wa Zaza.
