Mu Murenge wa Sake hatanzwe inka y’ubumanzi yahawe umukuru w’umudugudu wa Nyakagezi, mu Kagari ka Gafunzo nk’umudugudu w’indashyikirwa mu Karere ka Ngoma muri gahunda y’umudugudu uzira icyaha; ni igikorwa cyabereye ku biro by’umurenge wa Sake kuri uyu wa 20 Ukwakira.
Umudugudu uzira icyaha urangwa no kugira uburyo bwihariye bwo gukemura amakimbirane, kugira irondo rikora neza, kwandika abinjira n’abasohoka, ubwitabire buri ku kigero cyo hejuru muri gahunda za Leta nka Mituweli na Ejo Heza hakiyongeraho gahunda y’isuku n’isukura.
Mu karere ka Ngoma hashyizweho itsinda rigenzura uko izi gahunda zose zikurikizwa mu mudugudu maze umudugudu wa Nyakagezi uhiga indi midugudu yose irenga 400 yo mu Karere ka Ngoma, mu kwezi gushize kwa Nzeri mu nama mpuzabikorwa y’aka karere yari iyobowe na Guverineri w’Intara y’Iburasirazuba CG Gasana K.Emmanuel yasabye ko uyu mudugudu uzahabwa inka y’ubumanzi ikaba ishimwe ry’imiyoborere myiza.
Umuyobozi w’Akarere wungirije ushinzwe iterambere ry’ubukungu Mapambano N. Cyriaque avuga ko iki gikorwa cyije nk’ishimwe,
Yakomeje agira ati:” Nk’ uko twabitojwe n’Intore izirusha intambwe y’uko imvugo ikwiye kuba ingiro, nyuma y’ukwezi kumwe yemerewe inka, uyu munsi habaye umuhango wo kumushyikiriza inka ihaka nk’ishimwe ry’imiyoborere myiza yagaragaje muri uyu mudugudu.”
Umukuru w’umudugudu wa Nyakagezi Nyiramana Floride, avuga ko ibyo yagezeho abikesha ubufatanye n’abaturage ayobora ndetse n’abandi bayobozi bafatanyije kuyobora umudugudu kugeza ku Isibo,
Yakomeje agira ati: “Habayeho kwigisha abaturage no kubakangurira gahunda zose za leta kandi nabonye iyo habayeho kwigisha abaturage no kubakangura bidakozwe n’umuntu umwe, abaturage bahindura imyumvire.”
Bamwe mu batuye muri uyu Mudugudu wa Nyakagezi bemeza ko ibyo bagezeho babikesha umuyobozi wabo mwiza ubaba hafi, bemeza n’ iyi nka ahawe izabagirira akamaro nk’umudugudu kuko ntawuzongera kugira imirire mibi, kuri bo ngo iyi nka iri mu maboko mazima.
Umudugudu wa Nyakagezi ugizwe n’abaturage 421.
