Akarere ka Ngoma ku bufatanye n’inzego z’umutekano mu Murenge wa Rukira hangijwe ibiyobyabwenge birimo urumogi na Kanyanga n’ibindi bicuruzwa byarangije igihe cyo gukoreshwa bifite agaciro ka miliyoni eshatu z’amafaranga y’u Rwanda.
Ibiyobyabwenge byangijwe birimo urumogi n’akanyanga, na ho mu bicuruzwa byarangije igihe birimo, jus, imigati, ibinini ndetse n’amavuta yo kwisiga. Ni igikorwa cyabereye mu ruhame mu i Rukira, mu Kagali ka Buriba, kuri uyu wa 14 Ukwakira 2020.
Iki gikorwa cyatumye abaturage barushaho gusobanukirwa ko ibiyobyabwenge ari nyirabayazana w’amakimbirane mu muryango, nk’uko abo MUHAZIYACU yaganiriye na bo babivuga,
Mukamurigo Catherine ati: “Isomo nkuye hano ni uko nzajya namagana ibiyobyabwenge aho mbibonye hose kuko biratwicira abana, ikindi ni byo biri guteza amakimbirane mu muryango.”
Gwiza Jean Pierre we ati : “Ikintu ntitagaho ubusanzwe ni ukureba ko igicuruzwa cyujuje ubuziranenge , ariko ubu ngiye kujya mbaza ndebe ko kitarengeje igihe kuko namenye ko byagira ingaruka k’umubiri w’umuntu.”
Umuyobozi wungirije w’Akarere ka Ngoma ushinzwe ubukungu Mapambano Nyiridandi Cyriaque yasabye abacuruzi kureka gucuruza ibicuruzwa byarangije igihe kuko bigira ingaruka mu mubiri w’umuntu, anasaba abacuruza n’abakoresha ibiyobyabwenge kubireka.
Ati: “Mpereye ku bacuruzi, ndagira ngo dufatanye, kurarikira amafaranga ukumva ko ari yo ushyize imbere kandi wangije ubuzima bw’umuntu si byo rwose, niba ucuruza Jus ikarangiza igihe yikuremo uyijugunye,… ikindi abacuruza ibiyobyabwenge mubireke mushake izindi buzinesi mukora kuko zirahari zemewe n’amategeko.”
Ibiyobyabwenge n’ibicuruzwa byarangije igihe byangijwe mu karere ka Ngoma ni ibyakuwe mu mirenge itandukanye igize aka karere, byose hamwe bikaba bifite agaciro ka miliyoni 3 mu mafaranga y’u Rwanda.
