Abakora irondo ry’umwuga mu Karere ka Ngoma baravuga ko kutagira ibikoresho birimo telefone, amatoroshi, imyenda n’inkweto biri mu bituma batanoza akazi kabo neza.
Ibi barabivuga mu gihe leta yifuza ko abakora irondo ry’umwuga banoza akazi kabo neza mu rwego rwo kunoza umutekano ukwiriye umunyarwanda.
Bamwe mu bakora irondo ry’umwuga baganiriye na MUHAZIYACU bagaragaje ko kutagira ibikoresho birimo; amatoroshi,amakote, telefone, imyenda n’inkweto biri mu bituma batanoza akazi kabo neza nkuko babisabwa.
Seti Francois uturuka mu Murenge wa Jarama mu Kagari ka Jarama mu Mudugudu wa Dufatanye avuga ko mu bibazo bagihura nabyo bidindiza akazi kabo birimo kutagira imyambaro n’amatelefone abafasha mu kunoza akazi kabo neza.
Yagize ati: “Akarere iyo katanze telefone ku bakora irondo ry’umwuga bibagirwa abo mu rwego rw’Akagari, usanga abakora irondo ry’umwuga ku Kagari no ku Murenge nta telefone bagira kandi nibo bahuza ya makuru abandi baba babonye mu midugudu, kukijyanye n’imyambaro mu Murenge wa Jarama ntabwo twese turabona imyenda n’inkweto keretse iyo hagize ubyigurira.”
Yasabye ubuyobozi kubafasha gukemura ibi bibazo kuko ngo byakemura ikibazo cyo gutinda kw’amakuru biterwa no kwirwanaho mu kuyageza ku buyobozi bubakuriye.
Niyonizera Joseph uturuka mu Kagari ka Mvumba mu Murenge wa Murama we avuga ko kutagira inkweto, ikote na telefone za smart phone zajya zifashishwa mu gufotora ngo biri mu bituma uyu mwuga wabo utagenda neza nkuko babisabwa.
Ati: “Hari n’ikindi kuba nta matoroshi tugira hari ubwo tubona umuntu ugasanga turamurika dukoresheje telefone, iyo umuntu atabaje kandi ukajya kumureba unyagirwa ntabwo biba bimeze neza tubonye amakote nabyo byadufasha.”
Habiyakare Jean Baptiste uturuka mu Murenge wa Karembo mu Kagari ka Nyamirambo we yavuze ko bimwe mu bibazo bagira ari uko abahagarariye irondo ry’umwuga ku tugari nta telefone bafite bigatuma bigorana guhuza n’abo ku Mudugudu bo baba bafite kode, hyasabye ubuyobozi kubafasha bakabakemurira ibi bibazo ubundi bakarushaho gutanga serivisi neza.
Umuyobozi w’Akarere ka Ngoma wungirije ushinzwe Iterambere ry’Ubukungu, Nyiridandi Mapambano Cyriaque yavuze ko kuri ibi bibazo bifitwe n’abakora irondo ry’umwuga ngo hari icyizere cyo kubikemura kuko hari amabwiriza mashya agenga irondo ry’umwuga mu Ntara y’Iburasirazuba agiye gusohoka kandi akubiyemo byinshi mu byifuzo bafite.
Uyu muyobozi yabijeje ko mu minsi ya vuba byinshi mu bibazo bafite bizasubizwa ngo kuko leta yifuza ko banoza akazi kabo neza kandi bagatangira amakuru ku gihe.
Mu Karere ka Ngoma nibura buri mudugudu ukoresha abakora irondo ry’umwuga bane mu rwego rwo kwicungira umutekano, amafaranga abahemba akaba atangwa n’abaturage.
