Ubwo yagiriraga uruzinduko mu Karere ka Bugesera, Minisitiri w’Ikoranabuhanga na Inovasiyo, Ingabire Paula yasabye abarwariye Covid-19 mu ngo kubahiriza amabwiriza yo kuguma mu ngo no kwirinda kwanduza abandi.
Kuri uyu wa kabiri, tariki 20 Nyakanga, ni bwo Minisitiri Ingabire Paula yagiriye uruzinduko mu Karere ka Bugesera rugamije gukurikirana uburyo akarere gashyira mu bikorwa ingamba zo kwirinda ikwirakwizwa ry’icyorezo cya koronavirusi.
Uyu muyobozi yasuye abaturage babiri barwariye Covid-19 mu rugo i Gashora, abihanganisha ababwira ko igihugu kibakunda kandi kibazirikana, ariko abibutsa ko abarwaye iki cyorezo bafite inshingano yo kwiyitaho no kubahiriza amabwiriza atuma batanduza abo babana mu rugo cyangwa n’abaturuka ahandi.
Yakomeje agira ati: “Kuba muri hano Leta irabizi kandi irabazirikana, ari na yo mpamvu tuba tubasuye, bityo rero mukomeze gukurikiza ingamba bizafasha kuba mutakanduza abandi.”
Yasuye kandi ahakorerwaga isuzuma rusange rya Covid-19 (Mass Testing) ku kigo cy’amashuri cya Mayange B, asaba abasanze ari bazima “gukaza ingamba” no gukurikiza amabwiriza yo kwirinda, kuko ari “wo muti wa mbere ukomeye wo kurandura burundu iyi ndwara.”
Mbere yaho kandi Minisitiri Ingabire yifatanyije n’itsinda ryihariye rishinzwe gukurikirana uburyo Akarere kari mu ngamba zikumira ikwirakwira rya Covid-19, n’icyumba gikusanyirizwamo amakuru ya buri munsi ava mu mirenge yose igize akarere agaragaza uko icyorezo gihagaze.
Umuyobozi mukuru w’Ibitaro by’Akarere bya Nyamata Dr Rutagengwa William yasobanuye ko ibitaro byateguye ibyumba 4 bishobora kwakira abarwayi ba Covid-19. Muri cyumba harimo ibitanda bibiri ndetse n’ibikoresho byakwifashishwa mu gihe umurwayi abagannye.
Kugeza ubu mu Karere ka Bugesera hose hafashwe ibipimo 12,677, abasanzwemo koronavirusi basaga 2,078. Abakize bose ni 1,608, abakirwaye ni 443 naho abapfuye bose ni 27. Kugeza ubu abafashe doze zose z’urukingo rwa AstraZeneca ni 6,524, naho abafashe urukingo rwa Pfizer bo ni 1,392.
