Umuyobozi w’Akarere ka Bugesera Mutabazi Richard yagaragaje ko gusigasira ibikorwa biranga umuco nyarwanda birimo ibyivugo, imbyino, n’indi mirimo iranga imibereho yo mu Rwanda rwo hambere byongera gushimangira ubumwe n’ubudaheranwa bw’abanyarwanda.
Yabigarutseho kuri ku munsi w’umuganura tariki 04 Kanama 2023,ubwo yasuraga bimwe mu bikorwa biranga umuco nyarwanda birimo inzu ya kinyarwanda, imirimo yo gucunda amata, gushaka ibyo kurya bakoresheje uburyo gakondo bwo kotsa runonko(Nyiranonko bitewe n’agace), kwegera ibitoki mu muvure, kumasha no gusimbuka n’indi mirimo byibutsa abakuru bikanigisha abakiri bato bibarizwa muri Fondasiyo Gasore Serge.
Meya Mutabazi yagize ati: “Mu mbyino no mu byivugo mu muco wa kinyarwanda nabyo bifite umumaro wongera gushimangira bwa bumwe bwacu kandi kubera ko igihugu cyacu cyagiye kigira ibibazo bigatuma n’umuco hari aho ugenda utakara tukawugarura, uyu muganura urongera gushimangira ubudaheranwa.”
Munyaburanga Innocent avuga ko abana babo bagize umugisha wo kuba baturiye ikigo cyigisha abana umuco nyarwanda.
Ati: “Dufite amahirwe yo kuba abana bacu babona ikigo bigiramo iby’umuco bakamenya indangagaciro na kirazira ndetse no kuba basobanurirwa ubuzima abakurambere babagamo, yaba mu bikorwa bya buri munsi byo gushaka ibibatunga ndetse n’indi mirimo igamije kwimara irungu nk’imikino yo gusimbuka, kurasa, kwivuga, kubyina imbyino gakondo.”
Mu bindi bikorwa byabaye muri Bugesera harimo no kuganuza abatarahiriwe n’ibihe by’ihinga, ku munsi w’umuganura wabereye Ntarama, wanagaragayemo igikorwa cyo kuganuza imiryango yarumbije, ndetse no koroza amatungo maremare n’amagufi imiryango itoroye.
