Ubuyobozi bw’Akarere ka Kirehe busobanura ko muri aka karere hari ikibazo cy’ubuke bw’amazi muri rusange ku buryo hari n’aho abantu bashobora gutekereza ko ntayahari kandi ahari, bukagaragaza gahunda ihari yo kuba iki kibazo cyakemutse bitarenze 2024 bafatanyije n’abafatanyabikorwa.
Kirehe ni Akarere kagizwe n’imirenge 12, gatuwe n’abaturage bagera ku bihumbi 417, muri aka karere hakaba ari naho haherereye inkami ya Mahama, irimo impunzi z’Abarundi n’Abanyekongo(DRC).
Akarere kagaragaza ko ikigereranyo cy’abaturage bako bafite amazi meza nibura muri metero 500 begera ku bihumbi 299; bangana na 72%.
MUHAZIYACU yavuganye na bamwe mu baturage bo mu gice cy’Umujyi wa Nyakarambi, ugizwe n’ibice by’imirenge ya Kirehe na Kigina, bagaragaza ko kubona amazi meza bikiri ikibazo.
Habiyaremye Didieu wo mu Murenge wa Kirehe, Akagari ka Nyabikokora, Umudugudu wa Rutonde yagize ati: “Amazi meza dushobora kuyabona nka rimwe mu byumweru bibiri kuri robine yo murugo nabwo bayarekura nk’isaha imwe agahita agenda.”
Undi mugenzi we wari mu nzira ajya kuvoma ku isoko iri ahitwa Nyakagera yagize ati: “Ku kazu k’amazi naho amazi bashobora kuyarekura rimwe mu cyumweru ku manywa, iyo yabuze nko muri iyi minsi tujya kuvoma hepfo iyi Nyakagera ahari isoko kandi haragoranye nawe urabibona; twasaba ko twabona amazi meza hafi.”
Umuyobozi w’Akarere ka Kirehe wungirije ushinzwe iterambere ry’ubukungu Nzirabatinya Modeste yabwiye MUHAZIYACU ko ikibazo cy’amazi kizwi, agaruka no ku ngamba zihari zo kugikemura ku buryo burambye.
Ati: “Haba mu Mujyi wa Nyakarambi n’ahandi muri rusange amazi aracyari makeya. Rero kubera ko akiri make abantu bagira ngo nta ntayahari, ariko arahari nubwo ari make. Ikintu kihutirwa gikorwa ni ukujyana amazi ku mavomero manini ya rusange kuruta kuyajyana mu ngo z’abaturage, ayo mavomero manini dusaba abaturage kuyagana; hamwe na Kampani yitwa Ayateke[nka service provider] tugenda tuyasaranganya abaturage muri rusange.”
Yakomeje agira ati: “Mu ngengo y’imari y’uyu mwaka 2022-2023 Akarere kateganyije amafaranga yo kugura ‘Pompe[Moteri] eshatu zo kugira ngo zongere amazi, zizaboneka mu mpera z’uku kwezi kwa 12, nibura nko mu kwezi kwa mbere(Mutarama 2023) kukazashira zamaze kujyamo, ku buryo twizera ko icyo gihe amazi aziyongera.”
Akarere kagaragaza kandi hari gukorwa inyigo zo kuzana amazi meza gafatanyije n’Ikigo gishinzwe amazi n’isukura -WASAC n’Umuryango Water For People nk’umufatanyabikorwa w’Akarere; bikaba biteganyijwe ko nizimara gukorwa zizashakirwa ingengo y’imari; kugira ngo abaturage bako bose bazabe bafite amazi meza hafi muri 2024.
Nk’uko bigaragara mu bikorwa by’ingenzi Akarere ka Kirehe kazitaho muri uyu mwaka wa 2022-2023, gusana no kwagura umuyoboro w’amazi wa Gakirarugo mu Murenge wa Mpanga bizatwara ingengo y’imari y’amafaranga y’u Rwanda asaga miliyari imwe na miliyoni 43, naho kugura no gushyira moteri zizamura amazi ku miyoboro y’amazi ya Kahene, Nyakagera na Muguruka bizatwara miliyoni 150Frw.
Harimo kandi kwagura uruganda rutunganya amazi rwa Mahama bizatwara miliyari imwe na miliyoni 600, mu gihe ibindi bikorwa byo gusana ibikorwaremezo by’amazi byagenewe miliyoni 12Frw.
