Abaturage bo mu Murenge wa Mpanga, mu Kagari ka Mushongi bagaragaza ko mu bikorwaremezo bifuza ko byashakirwa ingengo y’imari bikazakorwa mu mihigo ya 2024-2025 harimo amashanyarazi, amazi meza, imihanda, isoko, iminara y’itumanaho n’imbangukiragutabara.
Biri mu byifuzo abaturage benshi bahurijeho mu nteko y’abaturage yo kuri uyu wa Kabari, tariki 14 Ugushyingo, yanitabirwe n’Ubuyobozi bw’Akarere ka Kirehe, yatangirijwemo ku rwego rw’Akarere gahunda yo kwakira ibitekerezo by’abaturage bifuza ko byashyirwa mu igenamigambi bikazakorwa mu mwaka utaha w’imihigo n’ingengo y’imari wa 2024-2025.
Ni ibyifuzo byagiye byakirirwa mu ruhame, aho umuturage wasabaga ijambo agahabwa umwanya, yatangaga icyifuzo, byagaragara ko gihuriweho n’abaturage benshi, itsinda ry’abayobozi ryari riri aho rikacyandika; kugira ngo byegeranywe bizatoranyweho ibyazakorwa mbere bikenewe cyane kurusha ibindi.
Nyabyenda Jean Marie Vianney wo mu Mudugudu wa Gitoma yagize ati: “Mu gace dutuyemo twagize amahirwe hari aho twatangiye kubona umuriro, ariko tubonye n’umuhanda mwiza ugera inaha byaba ari byiza cyane.”
Habineza Sept we yagize ati: “Turifuza isoko ryiza hano, ryubakiye ku buryo natwe nubwo bigaragara ko turi kure ariko nibura tukaba dufite isoko ryiza n’ibyo dukora bikajya bicururizwa hano, tugasora, tutavunitse ngo tujye kure za Nyakarambi.”
Mutuyimana Bellancile we yagize ati: “Dukeneye amazi meza yo kunywa kuko ayo twagiraga hose yarakamye.”
Mu kugaragaza uburyo ikibazo cyo kutagira amazi meza kibakomereye nubwo baturiye ikiyaga cya Rwampanga, Ubuyobozi muri uyu murenge bwagaragaje ko hari n’ubushakashatsi bwigeze gukorwa hambere bwagaragaje ko ayo mazi mabi bakoresha yo mu kiyaga ntawe ukwiye kuyanywa, kuko arimo ibintu byakwangiza ubuzima.
Mu bindi baturage bo mu Kagari ka Mushongi bahurijeho bakeneye harimo imishinga migari yo kuhira, kubakirwa ibiro by’Akagari bijyanye n’igihe, no gusaba ko amavuriro y’ibanze yubatswe muri uyu murenge yahabwa abakozi agatanga serivisi.
Iyamuremye Antoine, Umunyamabanga Nshingwabikorwa w’Umurenge wa Mpanga na we yagaragaje ko nk’uko abaturage benshi babihurijeho, muri uyu murenge by’umwihariko mu Kagari ka Mushongi hakenewe cyane amashanyarazi, amazi meza, isoko, umuhanda ubahuza na Nyamugali na Nasho.
Yongeyeho ko hakenewe kandi umunara w’itumanaho kuko uburyo bw’itumanaho rya telefone no kumva radiyo zo mu Rwanda bigorana cyane cyane mu bice by’utugari twa Kankobwa, Nyakabungo na Rubaya n’ibice bya Mushongi. Ndetse hakaba hakenewe nibura imodoka y’imbangukiragutabara[Ambulance] yajya ihora hafi ikageza abarwayi by’umwihariko ababyeyi batwite bakiyeneye byihutirwa kwa muganga.
Nzirabatinya Modeste, Umuyobozi w’Akarere ka Kirehe wungurije ushinzwe iterambere ry’ubukungu yabwiye MUHAZIYACU ko kuba abaturage b’ i Mpanga bagaragaje ko ibyo bakeneye cyane ari ibikorwaremezo hari icyo bisobanuye.
Yagize ati: “Kuri twebwe tubona ari intambwe yatewe ntabwo bakifuza ibintu by’umuntu ku giti cye ahubwo barasaba ibintu bahuriyeho, umuhanda, amazi, amashanyarazi, ivuriro, Ambulance…ariko bikanagaragaza ako bya bibazo by’umwihariko by’umuryango batangiye kubisohokamo. Kino gice turimo ni igice cyera cyane imyaka, urabona ko ntibabaza ibibazo by’ibiryo, barabaza ibintu by’iterambere rwose.”
“Ibi bivuze ko ari umukoro baduhaye wo kugenda tukareba mu bushobozi buba buhari, amafaranga aturuka mu misoro, aboneka ku bufatanye na gahunda za Leta zitandukanye n’abafatanyabikorwa kugira ngo tuze turebe ko ibyo basabye babihabwa.”
Yakomeje avuga ko ikindi kintu gikorwa ari uko Ubuyobozi bubanza guha abaturage ibisubizo ku byifuzo baba barasabye umwaka ushize, kugira ngo bamenye impamvu hari icyifuzo runaka basabye kitakozwe.
Nyuma y’uko ibyifuzo byakiriwe ku rwego rw’Akagari, biteganywa ko inama njyanama y’akagari iterana igakusanya bya byifuzo ikemeza bitatu by’ingenzi kuri buri nkingi[imiyoborere myiza, imibereho myiza no mu bukungu] bikazamuka bigashyikirizwa Njyanama y’Umurenge, nayo igahuza ibyifuzo byavuye mu tugari, bikagezwa kuri Njyanama y’Akarere nayo ikazaterana ikemeza ibyifuzo byavuye mu mirenge; aribyo bizavamo ibishyirwa mu mihigo y’Akarere ya 2024-2025 nyuma yo kwemezwa na Minisiteri ifite imari n’igenamigambi mu nshingano ibifitiwe ingengo y’imari bihite bishyirwa mu bikorwa.
