Abakristu 26 bo mu Itorero rya ADEPR Paruwasi ya Nyarubuye mu Murenge wa Nyarubuye mu Karere ka Kirehe, basanzwe mu rusengero bikingiranye bari gusenga barenze ku mabwiriza yo kwirinda COVID-19.
Aba baturage bafashwe mugitondo cyo kuri iki Cyumweru tariki 18 Nyakanga 2021, mu Murenge wa Nyarubuye mu Kagari ka Mareba ahagana saa tanu, bafatirwa mu rusengero ruri mu zitaremererwa gufungura.
Gatsinzi Ananie Umunyamabanga Nshingwabikorwa w’Umurenge wa Nyarubuye, mu kiganiro yagiranye na MUHAZIYACU, yavuze ko babasanze mu rusengero wa ADEPR bifungiranye bari gusenga, yavuze ko abakristo bose bashijinje Umushumba wabo kubashuka bakaza gusenga.
Yagize ati: “Ubu turi kubapima ngo turebe niba badafite iki cyorezo buri wese ariyishyurira ikiguzi cy’amafaranga yo kwipimisha 10 000 Frw, tunamuce amande 5000Frw kuri buri umwe, ku rusengero rwo turaruca amande 150 000 Frw kuko barenze ku mabwiriza.”
Uyu muyobozi yasabye abaturage gukomeza kwitwararika, bakirinda guhura, gusenga n’ibindi bikorwa bitemewe muri iyi minsi icyorezo cya COVID-19 kiri kwiyongera hirya no hino.
Inama y’Abaminisitiri yateranye kuwa 14 yafatiwemo ingamba zikomeye zo kwirinda iki cyorezo gikomeje kwiyongera mu Rwanda, uturere umunani n’Umujyi wa Kigali twashyizwe muri Guma mu rugo kugira ngo iki cyorezo cya Covid-19 kidakomeza kwiyongera mu baturage.
