Umugore witwa Zainabu wo Mudugudu wa Kivugiza, Akagari ka Kayonza mu Murenge wa Mukarange mu Karere ka Kayonza, yatawe muri yombi nyuma yo gukomeretsa bikomeye mugenzi we witwa Mukamurenzi, umushinja kumutwarira umugabo.
Igikorwa cyo gufata Zainabu w’imyaka 53 cyakozwe na Polisi ifatanyije na RIB kuri sitasiyo ya Mukarange.
Amakuru yizewe MUHAZIYACU ifite ni uko ubu Mukamurenzi w’imyaka 52 ari kuvurirwa ku Kigo Nderabuzima cya Mukarange naho Zainabu we akaba yashyikirijwe RIB, Sitasiyo ya Mukarange.
MUHAZIYACU yahamagaye Umunyamabanga Nshingwabikorwa w’Umurenge wa Mukarange, Patrick Kabandana atubwira ko ari uko byagenze.
Yagize ati: “Nibyo koko ariko uwakomerekeje undi yagiye kubibazwa. Ntabwo bisanzwe kuko twari tumenyereye abarwana basinze ariko aba bo ni abo mu miryango.”
Gitifu Kabandana yasabye abaturage kugana ubuyobozi igihe cyose bagiranye amakimbirane aho kwihanira.
Ati: “Hari uburyo buhari bwo gukemura amakimbirane dufite, buri wa Gatatu haba inteko z’abaturage, kuwa Kane ku murenge turabakira. Kwihanira bikurura ibibazo kuko hari naho bivamo urupfu.”
Gukubita no gukomeretsa ari icyaha gihanwa n’ingingo y’ 121 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange.
