Umugabo witwa Semucyo Epimaque wari ufite umugore n’abana batuye mu Mudugudu wa Kigarama mu Kagari ka Nyamugali mu Murenge wa Mwili yiyahuye anyoye umuti wica udukoko two mu myaka witwa Dudu, nyuma yo gutongana n’umugore we bapfa ibishyimbo yagurishije.
Nyuma yo kunywa kuri uyu muti abaturanyi bamujyanye ku kigo Nderabuzima cya Nyakabungo bamwohereza ku bitaro bya Gahini ari naho yaje gupfira.
Amakuru MUHAZIYACU yahawe n’umwe mu baturanyi b’uyu muryango avuga bari bamaze igihe bafitanye amakimbirane, ejo tariki ya 13 ngo umugabo yafashe ibishyimbo byose bari barejeje arabigurisha amafaranga arayanywera atashye atongana n’umugore we birangira afashe umwanzuro wo kwiyahura.
Ibi ni nako byemejwe na Nsoro Bright, Umunyamabanga Nshingwabikorwa w’Umurenge wa Mwili mu kiganiro yagiranye na MUHAZIYACU.
Yagize ati: “Nibyo koko yiyahura, abaturage bampamagaye ejo bamujyanye kwa muganga, bansobanurira ko uyu mugabo yanyweye umuti usanzwe ukoreshwa mu myaka nyuma yaho ashwaniye n’umugore we bari basanzwe bafitanye amakimbirane ashingiye ku gusesagura umutungo byakorwaga n’uyu mugabo, umugore yamucyaha undi ntiyumve.”
Gitifu Nsoro yavuze ko kuri ubu basaba abaturage kwihanganirana bakabana neza ababonye uburyo babanye bishobora kuvamo kwicana bakegera ubuyobozi bukabafasha mu gukemura ibibazo bafitanye.
Yavuze ko ubuyobozi guhera ku isibo, ku mudugudu, akagari no ku murenge ubuyobozi bwose bwiteguye kubumva bukanabafasha gukemura ibibazo baba bagiranye.
