Abaturage bo mu Mudugudu wa Rugeyo. Akagari ka Kageyo, mu Murenge wa Mwili barasabwa kwita ku bikorwaremezo bahawe cyane cyane inzu batujwemo.
Ubuyobozi bw’Akarere ka Kayonza bwabibasabye kuri uyu wa Gatandatu nyuma y’umuganda rusange usoza Mutarama 2023, mu gihe abaturage batujwe mu mudugudu w’icyitegererezo wa Rugeyo mu kagari ka Kageyo bagaragaza ko hari bimwe mu bikorwa bigaragara ko bimaze gusaza; bizezwa ko bigiye gusanwa ariko nabo bibutswa ko bakwiye kubyitaho bakabibungabunga.
Umuyobozi w’Akarere ka Kayonza Nyemazi John Bosco yagarutse kubyo nk’akarere bagiye gukorera aba baturage n’icyo nabo basabwa.
Ati: “Hari ikibazo kiri hano cyo kuvugurura, hari ushinzwe imyubakire ugiye kuza hano gukurikirana imyubakire no kuvugurura ibitaragenze neza, ni ukugira ngo tubijyanishe n’uko aha hantu hakwiye kuba hameze, ibi ntibikuraho inshingano zikomeye twe abaturage dufite guhabwa inzu ni ikintu kimwe ariko na none inshingano zacu ni ukubungabunga ibyo twahawe, umukuru w’igihugu yabahaye aho kuba n’ibindi bikorwaremezo ariko ibirebana n’uko ibi bikorwaremezo bizakoreshwa ni inshingano zanyu.”
Meya Nyemezi yakomeje abwira abaturage ko uwo bizagaragaraho ko atita kubyo yahawe agomba kubibazwa, aha kandi yagarutse ku ruhare rw’ubuyobozi bugomba kubaba hafi, bukabafasha gukurikirana no kwita ku bikorwaremezo bahawe.
Bamwe mu batuye mu mudugudu wa Rugeyo bemeza ko ibyo bazasanirwa bari baragerageje kubisana ubushobozi bukaba bucye nk’uko byemezwa na Rukaka Aron umusaza uri mu kigero cy’imyaka 85 mu ijwi risa nk’irinaniwe, yagize ati: “Birahenze dukora ibyo tubashije, zimwe muri izi nzu zirava, izindi imiryango n’imisarani imeze nabi, inzira z’imyotsi ntizikora.”
Undi muturage witwa Nikuze Esther ni umuturanyi w’abahawe inzu yemeza ko abahawe izi nzu bazi akamaro kazo,
Yagize ati: “Abaturage bacu bubakiwe amazu bagerageza kuyafata neza nk’iyo ari umusaza ubona asabye mudugudu ko bamuha umuganda bakamusanira inzu.”
Umudugudu wa Rugeyo ufite inzu z’icyitegererezo 76, ufite igikumba rusange kirimo inka 54, izimaze kubyara ni 37.
