Mu Karere ka Kayonza hatangijwe gahunda yo gusinya imihigo hagati y’abaturage n’inzego z’ibanze, hagamijwe gukumira ibyaha no kugira umudugudu uzira ibyaha.
Ni igikorwa cyatangirijwe mu Mudugudu wa Gasabo, mu kagari ka Nkondo mu Murenge wa Rwinkwavu kuri uyu 28 Mata 2021.
Umudugudu wa Gasabo watangirijwemo iyi gahunda yo gusinyana imihigo hagati y’abaturage n’abayobozi b’imidugudu, ni umwe mu midugudu yo mu Kagari ka Nkondo ufite ikibazo cyo kutumvikana hagati y’abaturage ubwabo, hari ibibazo by’ibiyobyabwenge n’ikibazo cyo konesherezanya.
Abaturage bo muri uyu murenge bavuga ko ikibazo cy’umutekano mucye bagiterwa n’urugo rumwe rufite imyitwarire mibi, bituma buri muturage agirana ikibazo nabo. Ingero zitangwa ni bamwe mu baturage baterwa amabuye, abonesherezwa ndetse ngo ku nzira y’aho batuye hari abahacitse kuko baterwa amabuye.
Munyembabazi Lambert ni umuturage uvuga ko aterwa amabuye, ngo muri uku kwezi kwa Mata amaze guterwa amabuye inshuro esheshatu.
Abajijwe uko yumva byagenda kugira ngo ikibazo afitanye n’abaturanyi be gikemuke, Munyembabazi yagize ati: “Ni ngombwa ko ubuyobozi budufasha muri iki kibazo tukabana neza.”
Mukamurera Epiphania bakunze kwita Mama Mukuru avuga ko ikibazo afitanye n’abaturanyi be giterwa n’umwana uri mu rugo ufite ikibazo cy’uburwayi, iyo avuganye nabi n’abana bo ku muturanyi atangira guterayo amabuye, avuga ko uyu mwana bagiye kumujyana kwa muganga akavurwa.
Mama Mukuru avuga ko nubwo hari icyo kibazo cy’umwana ariko ngo abaturage bo muri uyu mudugudu bataabanye neza.
We yagize ati: “Ndasaba ko abayobozi baduhuza tukaganira uwo basanga ari mu makosa agahanwa.”
Umuyobozi w’Akarere ka Kayonza, Murenzi Jean Claude, yasabye abaturage kubana mu mahoro, bakoroherana kugira ngo barusheho kugira umudugudu utekanye, uzira amakimbirane.
Meya Murenzi yasabye abayobozi b’imidugudu n’abo mu tugari kwita ku bibazo by’abaturage no gushakira umuti ibibazo biteza umutekano mucye.
Iyi gahunda yo gusinyana imihigo hagati y’abaturage n’inzego z’ibanze yatangijwe na Guverineri w’Intara y’Iburasirazuba muri gahunda yo gukumira ibyaha no kugira umudugudu uzira icyaha, yashyigikiwe na Minisitiri w’ubutegetsi bw’igihugu ubwo yasuraga Intara y’Iburasirazuba.
