Bamwe mu baturage bakoze imirimo y’ubuyede hasudirwa intebe ku ishuri ribanza rya Rumuri riherereye mu Murenge wa Rukara, baravuga ko hashize umwaka urenga bishyuza amafaranga bakoreye ariko bakaba batarishyurwa.
Umwe muri aba baturage yagize ati: “Njye nasigaga Antiruye, no guhereza mu gihe twubakaga, kandi icyo gihe twari muri bya bihe bya Corona ariko n’ubu sindishyurwa.”
Uyu utashatse gutangaza amazina ye n’umubare w’amafaranga yishyuza, avuga ko rwiyemezamirimo yagiye atabishyuye.
Undi muturage yagize ati: “Twumvise ko ku Murenge bamusigayemo amafaranga, kuko yanze natwe kutwishyura, aba iyo za Nyabihu. Turasaba ubuyobozi kutwishyuriza uwo rwiyemezamirimo kuko biri kutugiraho ingaruka, turakennye.”
Umunyamabanga Nshingwabikorwa w’Umurenge wa Rukara, Immaculee Nyirabizeyimana, yemereye MUHAZIYACU ko iki kibazo bakizi kandi ko bari gukora ibishoboka byose ngo aba baturage bishyurwe.
Yagize ati: “Kugeza ubu abo tuzi bafite icyo kibazo ni abakoze ubwo hasudirwaga intebe. Ejo ku murenge hari uwahaje. Rwiyemezamirimo wakoraga ibyo gusudira byagaragaye ko hari abaturage atishyuye. Twafatiriye amafaranga ye ibihumbi 276 Frw kugira ngo azabanze akemure icyo kibazo cy’abo baturage bavuga ko atabishyuye.”
Gitifu Nyirabizeyimana yakomeje agira ati: “Ubu ntabwo birakemuka. Twasabye rwiyemezamirimo ko yaduha urutonde rw’abantu atarishyura ariko yagiye Nyabihu, ibyo bintu ntiyabikoze. Turi kuvugana n’Akarere ngo bikemuke noneho duhere kuri ariya twishyure abaturage.”
Uyu muyobozi yasabye abaturage kuzajya bahita bagana ubuyobozi igihe bafite ikibazo. Yasabye kandi ko bazajya bagira amakenga yo guhabwa ikigaragaza ko ari abakozi ba ba rwiyemezamirimo babakoresheje.
