Guverineri w’intara y’Iburasirazuba, Mufulukye Fred, aributsa urubyiruko ko aribo mbere na mbere bagomba guhitamo ahazaza heza habo, no gushikama kuri uwo mwanzuro bakirinda ingeso mbi zirimo zirimo ibiyobyabwenge n’ibindi byatuma bangiza imbere habo heza.
Ibi byagarutsweho kuri uyu wa Kabiri tariki ya 17 Ukuboza 2019, ubwo urubyiruko rusaga 1200 ruturutse mu turere twose two mu Ntara y’Iburasirazuba rwateraniraga mu Karere ka Ngoma mu biganiro byateguwe n’Umuryango
uharanira Ubwigenge, Agaciro n’Iterambere by’ Umunyafurika
(Panafrican Movement, Rwanda Chapter).
Ibi biganiro byari bifite insanganyamatsiko igira iti “Rubyiruko twirindire ubuzima, ejo hacu ni heza”.
Ibibazo byugarije imibereho y’urubyiruko byaganiriweho ni ikoreshwa ry’ibiyobyabwenge, iterwa inda ry’abangavu, ndetse ikibazo cyo guta ishuri.
Guverineri Mufulukye ubwo yaganirizaga uru rubyieuko yagize ati: “Muhitemo ejo heza h’ubuzima bwanyu, inzira ntigoroye, igenda igiramo amakorosi, hari aho muzagera muhure n’ibibazo, mubone bigoye ariko icyo bibasaba ni kwa guhitamo kwanyu ugahagarara ku cyemezo wafashe, igihe kiragera bya bibazo bigatambuka.”
Mufulukye atanga urugero rw’Inkotanyi zabohoye u Rwanda, ukuntu bari batoya, benshi muri bo bataragera mu gihugu cyabo na rimwe, ntan’ intwaro zihagije bafite.
Ati: “Icyo bari bafite ni umutima, ni ukwiyemeza ngo tugomba kubohora u Rwanda, uyu munsi twese turishimira Igihugu cyacu”.
Uyu muyobozi kandi yasabye urubyiruko kwirinda ibyakwangiza ahazaza habo, ashimangira ko nta muntu utagira ibibazo, ariko ko umuti utari mu biyobyabwenge, guta ishuri cyangwa se kwishora mu busambanyi ukurikiye utuntu wahabwa nk’impano.
Yongeye ati: “Hari benshi babayeho badafite ababyeyi, badafite Igihugu. Rubyiruko ayo ni amahirwe mufite yo kugira Igihugu kibakunda, mufite abayobozi beza babagira inama, mufite amahirwe yo kwiga kuri buri wese n’andi mahirwe”.
Umuyobozi wa Urwego rw’Igihugu rw’Ubugenzacyaha (RIB) mu Ntara y’Iburasirazuba, Rutaro Herbert, yaburiye urubyiruko ku bubi bw’ibiyobyabwenge ku buzima bw’umuntu, ariko cyane cyane ku bihano amategeko ateganya ku bafashwe babinywa cyangwa babicuruza.
Yavuze ko ibihano byo kunywa no gucuruza ibiyobyabwenge bikarishye, ubu noneho hakaba hari n’aho umuntu ashobora gufungwa burundu aramutse ahamwe n’icyaha cy’ubucuruzi bubyamutsa imipaka. Ati: “Turababara cyane kuko abantu batabizi.”
Niyibizi Dani ufite imyaka 22, uturuka mu karere ka Bugesera, mu murenge wa Nyamata, yavuze ati: “Ni twebwe mbaraga z’igihugu kandi zubaka vuba, tugomba guhindura ibitekerezo by’abantu, yewe tukanahera ku biyobyabwenge kuko ni bimwe mu biteza ibindi byaha byinshi.”
Umuryango Pan African Movement ishami ry’u Rwanda watangiye ku wa 8 Kanama 2015 n’abanyarwanda bagamije gufatanya n’abandi banyafurika guharanira agaciro no kwigira kw’abatuye uyu mugabane.
