Mu Karere ka Bugesera kimwe n’ahandi hose mu Ntara y’Iburasirazuba hatangijwe icyumweru cyahariwe ibikorwa byo kwimakaza ihame ry’uburinganire, kizibanda mu kwandikisha abana mu gitabo cy’irangamimerere, gusezeranya imiryango ibana mu muryo butemewe n’amategeko, kurwanya amakimbirane agaragara mu ngo.
Ni ubukakangurambaga bwatangiye kuri uyu wa kabiri tariki 07 Werurwe 2023, butangirizwa mu nteko z’abaturage mu mirenge yose igize Akarere ka Bugesera.
Umuyobozi w’Akarere ka Bugesera, Mutabazi Richard yagaragaje ko muri iki cyumweru abaturage bongeye kubona amahirwe yo kwandikisha abana mu irangamimerere nta mande batanze ndetse n’imiryango ibana itarasezeranye igafashwa kubikora.
Ati: “Muri iki cyumweru turabakangurira kwandikisha abana. Babandi bose bari bafite ibibazo byo kwandikisha abana, iki nicyo gihe bashobora no kudohora. Icyakabiri abantu babana batarasezeranye baze tubasezeranye mukore ubukwe mubone ibyangombwa.”
Meya Mutabazi yakomeje asaba abaturage kugabanya amakimbirane yo mu ngo ngo kuko atuma abana bagira imibereho mibi.
Ati: “Mugabanye amakimbirane yo mu miryango. Dufatanye kuyagabanya, dusure ingo zirimo amakimbirane tubafashe kuyasohokamo. Nta kintu na kimwe amakimbirane agezaho abantu, ahubwo ni kimwe mu bituma abana bagwingira.”
Hakuzimana Michael wo mu Kagari ka Biryogo mu Murenge wa Gashora wari witabiriye inteko y’abaturage yanatangirijwemo iki icyumweru cyahariwe kwimakaza ihame ry’uburinganire avuga ko iki cyumweru kizabagirira akamaro.
Ati: “Iki cyumweru kizatugirira akamaro kuko hari imiryango yateganyaga gusezeranya byemewe n’amategeko none ubu bizihuta kuko basabaga n’ubufasha bwihuse.”
Hakuzimana akomeza avuga ko hari n’abaturanyi be bafite abana batandikishije mu irangamimerere, ati: “Ni n’amahirwe ku bantu bafite abana batanditse. Ubu hari abaturanye banjye babigiriyemo amahirwe kuko bari baracikanwe umwaka ushize birangira batabandikishije. Rero turizera ko iki cyumweru kizakemura byishi kuko buri wese yabimenyeshejwe kare.”
Icyumweru cy’ibikorwa byo kwimakaza ihame ry’uburinganire mu Karere ka Bugesera no mu tundi turere tugize Intara y’Iburasirazuba cyatangiye tariki 07 Werurwe 2023, kikazasozwa tariki 13 Werurwe 2023, aho gifite insanganyamatsiko igira iti: “Ihame ry’uburinganire, inkingi y’imiyoborere myiza n’iterambere ridaheza kandi rirambye.”
