Akarere ka Nyagatare kaje ku isonga mu turere tugize Intara y’Iburasirazuba mu mitangire ya serivisi zikenera ikoranabuhanga (ICT) kagira amanota 74.4% nk’uko byatangajwe n’Urwego rw’Igihugu cy’Imiyoborere (RGB).
Ibi byagarutsweho kuri uyu wa 2 Ukuboza 2025, mu nama yateguwe hagamijwe kugaragaza ibyavuye mu bushakashatsi bwa Citizen Report Card (CRC) yabereye mu Karere ka Nyagatare.
Mu byatangajwe na RGB, Akarere ka Nyagatare kaje ku isonga mu mitangire ya serivisi hifashishijwe ikoranabuhanga, ibintu byashimangiwe ko ari intambwe ikomeye mu kwihutisha serivisi no korohereza abaturage kuzibona mu buryo bwihuse kandi butagoranye.
Mu gihe Nyagatare yegukanye umwanya wa mbere n’amanota 74.4%, Akarere ka Kayonza niko kaje ku mwanya wa nyuma mu Ntara y’Iburasirazuba, gafite amanota 67.3% mu bijyanye no gukoresha ikoranabuhanga mu mitangire ya serivisi.
Umuyobozi w’Akarere ka Nyagatare, Gasana Stephen yagaragaje ko umwanya aka karere kagezeho uturuka ku bikorwaremezo n’imishinga iri gushyirwa mu bikorwa igamije gufasha abaturage kumenya no gukoresha ikoranabuhanga buri munsi, yagize ati: “Nyagatare iri mu rugendo rwo guteza imbere ikoranabuhanga ku buryo bwagutse. Uyu mwanya twabonye uradushimishije, ariko tugomba kongera imbaraga kugira ngo serivisi zirusheho kwihuta tujyane nk’igihe nk’Akarere kunganira umujyi wa Kigali.”
Kugeza ubu mu mujyi wa Nyagatare, harimo kubakwa ubusitani bugezweho buzashyirwamo interineti y’ubuntu (Free Wi-Fi) ku baturage bose. Ibi bizatuma abaturage bashobora kubona amakuru byihuse, kwiga, gukora ubushakashatsi no gukurikirana serivisi za Leta mu buryo bworoshye.
Umuyobozi Mukuru wungirije wa RGB, Dr. Felicien Usengumukiza, yasobanuye ko CRC ari gahunda ifasha Leta kumenya neza imyitwarire y’inzego zayo, ibyishimo n’ibibazo by’abaturage kugira ngo hakorwe ingamba zishingiye ku bimenyetso bifatika.
Dr. Usengumukiza avuga ko ibyavuye mu bushakashatsi atari ari amanota gusa, ahubwo biba ari imirongo migari izafasha ubuyobozi kunoza serivisi no gukomeza gusubiza ibikenewe n’abaturage.
