Ikigo gishinzwe Ubumenyi bw’Ikirere (Meteo-Rwanda), kivuga ko muri uku kwezi k’Ugushyingo 2022 ibice byinshi by’Intara y’Iburasirazuba birimo Akarere ka Kayonza, Bugesera na Kirehe hateganyijwe imvura nke ugereranyije n’izagwa mu bindi bice by’igihugu.
Meteo Rwanda ivuga ko muri uku kwezi k’Ugushyingo 2022 ibice byinshi by’Intara y’Iburasirazuba ndetse no mu Mayaga mu Majyepfo, hateganyijwe imvura nke ugereranyije n’isanzwe ihagwa mu mezi y’Ugushyingo.
Meteo Rwanda ikomeza ivuga ko muri uku kwezi mu gihugu hose hateganyijwe imvura iri hagati ya milimetero (mm) 50 na 250, ikaba iri ku kigero cy’imvura isanzwe igwa mu kwezi k’Ugushyingo mu bice byinshi by’Intara y’Iburengerazuba, Amajyepfo n’Amajyarugru.
Ni mu gihe ibice byinshi by’Intara y’Iburasirazuba ndetse n’igice gito cy’Intara y’Amajyepfo (Amayaga), hateganyijwe imvura nke ugereranyije n’isanzwe ihagwa mu kwezi k’Ugushyingo.
Meteo Rwanda yagize iti ” Imvura nke ugereranyije n’izagwa ahandi mu gihugu izaba iri hagati ya milimetero 50 na 100, ikaba iteganyijwe mu bice byinshi by’uturere twa Bugesera, Kayonza na Kirehe n’ibice bimwe by’Umujyi wa Kigali (Kicukiro, Nyarugenge), Akarere ka Gatsibo ndetse n’igice cy’Amayaga.”
Iki kigo ariko hari aho kivuga ko hazaboneka imvura nyinshi. Kiti “Imvura iteganyijwe ahantu hatandukanye mu Rwanda, aho imvura nyinshi ugereranyije n’izagwa ahandi mu Gihugu (200mm-250mm), iteganyijwe mu bice bimwe by’Uturere twa Rusizi, Nyamasheke no mu majyaruguru y’uturere twa Rubavu, Nyabihu, Musanze na Burera.”
Imvura iteganyijwe kugabanuka uko uva mu burengerazuba bw’Igihugu ugana mu burasirazuba, bikazaterwa n’imiterere ya buri hantu hashingiwe ku kuba hari amashyamba, ibiyaga cyangwa imisozi.
Meteo Rwanda ivuga ko imvura izatangira kugwa kuva tariki 03 Ugushyingo 2022, imare iminsi ibarirwa hagati y’itatu n’irindwi mu gice cya mbere cy’uku kwezi (tariki 01-10).
Muri uku kwezi kandi hanateganyijwe umuyaga mwinshi mu bice bimwe by’Uturere twa Nyaruguru, Huye, Nyamagabe, Nyanza, Ruhango, Kamonyi na Bugesera, ukazaba ufite umuvuduko uri hagati ya metero 8 na 10 ku isegonda.
