Umuyobozi w’Intara y’Iburasirazuba CG Gasana K.Emmanuel yemeza ko hari amasantere y’ubucuruzi ari muri iyi ntara agaragaramo umwanda bityo mu kuwurwanya hakenewe uruhare rw’abagize urugaga rw’abikorera (PSF); bamwe muri bo bakavuga ko biteguye kuwurwanya ariko n’inzego zibishinzwe zikwiye guhana abatabikora.
Mu nama iherutse guhuriza mu Karere ka Kayonza abikorera bo mu Ntara y’Iburasirazuba bahagarariye abandi kuva ku murenge kugeza ku urwego rw’Intara, Abayobozi b’uturere twose tw’Intara, na Perezida wa PSF ku rwego rw’Igihugu, hagarutswe ku ruhare rw’abikorera mu kwimakaza umuco w’isuku.
Guverineri CG Gasana ubwo yagarukaga kuri iki kibazo yagize ati: “Turifuza ko mugira ibintu byiza, mukora ibintu byiza ariko namwe aho muri muhasukure, murabona ahantu hose ku muhanda mu masantire y’ubucuruzi hari umwanda rwose, ni ubutumwa mukwiye gutwara ku bandi mukorana ba PSF hariya hasi mukabikangurira abo bose kwita ku isuku.”
Bamwe mu bikorera bo mu mujyi wa Rwamagana bemeza ko nabo bakwiye kugira uruhare mu isuku yaho bakorera, umwe muri bo ni Zaninka Asiya acuruza ibitoki yagize ati: “Nta muturage n’umwe utazi ko akwiye kugirira isuku aho akorera ariko hari ikindi dukwiye kwibuka ubu koko umuntu utagira isuku iwe uzaza kuyimubaza aho akorera ku muhanda? Hari benshi bagirira umwanda aho bakorera wabakurikirana mu mibereho ugasanga bo kugira umwanda ntacyo bibatwaye, hakenewe ko ubukangurambaga bukomeza kandi n’ibihano bikiyongera.”
Undi muturage utashatse ko amazina ye atangazwa yagize ati: “Hari abantu usanga bafite umwanda aho bakorera, ariko se ubuyobozi bukora iki? Mu mafaranga batwaka habamo n’ay’isuku kuki abo babishinzwe batabibazwa? Uzace kuri babandi bakubura uzamenya ibyo mvuga, bakubura basa nkabikiza.”
Usibye ibi by’umwanda w’ahakorerwa hari n’aho umwanda ugaragara ku mihanda minini, imyanda mu makaritsiye ndetse na zimwe mu nzu zishaje zidakorerwa isuku.
