Hari bamwe mu baturage bo mu Kagari k’Isangano mu Murenge wa Ndego bemeza ko hari abari barataye icyizere cyo kubaho kuko batagerwagaho n’amazi meza n’amashanyarazi, none ubu barashima Leta y’u Rwanda itarabatereranye.
Ubwo hatahwaga igikorwa cyo kugeza amazi meza ku baturage bo mu mudugudu wa Kagese ndetse n’amashanyarazi byakozwe muri gahunda y’Ingabo na Polisi mu bikorwa bigirira akamaro abaturage ( Defence and security Citizen outreach Programm 2025) bamwe muri aba baturage baganiriye n’umunyamakuru wa MUHAZIYACU bemeza ko aha hari abari baritakirije icyizere cyo kubaho kuko aho batuye batagiraga amazi meza n’amashanyarazi.
Ntakirutimana Etienne ni we wemeye ko isambu ye banyuzamo umuyoboro w’amazi nta kiguzi abatse, ibi yabitewe n’uko yakiriye inkuru nziza y’uko bagiye kubona amazi meza akishimira kuba na we yabigiramo uruhare.
Yakomeje agira ati: “Ibikorwaremezo twagiraga ni amashuri n’amavuriro ariko nta mazi meza twagiraga nta n’amashanyarazi, kuba twarabonye amazi ni ibintu twishimiye cyane.”
Ibikorwa byatashywe birimo umuyoboro w’amazi, ibigega n’amavomero byaje nyuma y’uko akarere gafatanyije na REG bagejeje amashanyarazi muri aka kagari k’Isangano ndetse ubu hakurikiyeho gahunda yo gusakaza amazi meza mu ngo ndetse n’amashanyarazi
Bavugwaruta Christine ni umwe mu baturage bakomerekejwe n’imvubu ubwo yari agiye kuvoma mu kiyaga cya Rubare, ahamya ko kubona amazi meza muri Ndego zari inzozi bumvaga batazakabya
Yakomeje agira ati: “Nejejwe n’uko baduhaye amazi meza, ubu sinzongera kwirukankanwa n’imvubu cyangwa se ngo nongere kuvoma ibiziba, twavomaga amazi mabi, ayo kandi niyo inka zishokamo.”
Umuyobozi w’Akarere ka Kayonza Nyemazi John Bosco yavuze ko aya mazi azagera ku baturage 3,000, hakiyongeraho ko azanakoreshwa cyane n’ikigo cya GS Ndego II, hakiyongeraho ikigo nderabuzima ndetse n’abandi baturage baturanye n’aba, n’aho taransifo yagejejwe mu Isangano ikazafasha ko igice cyari gisigaye muri Ndego kitabona amashanyarazi ubu nacyo kizaba kiyabonye.
Umugaba mukuru w’ingabo z’u Rwanda Gen. Muganga Mubarakh yashimye abaturage ba Ndego, yakomeje agira ati “turabibutsa kubungabunga ibikorwa nk’ibi bibafitiye akamaro bya buri munsi kandi mukarushaho kurangwa n’ubufatanye kandi tukibuka ko kugira umutekano ari ingenzi, kandi urugamba rwo kugera ku iterambere ry’abaturage bacu bose rurakomeje”
Iki gikorwa cyo kugeza amazi meza ku baturage ba Ndego mu Isangano kirangiye gifite agaciro k’amafaranga y’u Rwanda miliyoni 147.
