Ubuyobozi bw’Akarere ka Gatsibo bwatangaje ko buri muri gahunda yo kubaka no gusana isoko ry’umujyi wa Kabarore kugira ngo abarikoreramo bacuruze batekanye.
Umuyobozi w’Akarere wungirije ushinzwe Iterambere ry’Ubukungu, Sekanyange Jean Leonard yabwiye Muhazayacu ko ubuyobozi bwasuzumye bugasanga isoko rya Kabarore ribangamiye abaturage bityo bukaba bwarafashe ingamba zo kuryubaka.
Yagize ati: “Abaturage cyane cyane abo mu mujyi wa Kabarore bakoresha iri soko bahahiramo banacururizamo. Ni isoko ubona ko rimaze igihe kinini ryubatswe rikeneye gusanwa, icyo turimo dukora ni ugushaka ubushobozi ngo turisane.”
Sekanyange yakomeje avuga ko mbere y’uko ibyo byose bigerwaho hagiye kubanza hasanwe isoko risanzwe rihari kuko Akarere kari mu biganiro n’abikorera kugira ngo hubakwe isoko ryiza rigezweho rijyanye n’igihe.
Ati: “Isoko kuryubaka byo birahenze kandi twifuza ko twakubaka isoko rijyanye n’ icyerekezo, ikiriho ni uko duteganya kurisana igihe gito kugira ngo abarikoresha, abajya kurihahiramo bajye basanga ari ahantu heza , ariko dufite na gahunda yo kuzubaka isoko ryiza ry’icyerekezo ribereye akarere kacu.”
Ni mu gihe bamwe mu bacururiza mu isoko rya Kabarore baganiriye na MUHAZIYACU basaba ko ryasanwa kuko bavirwa n’imvura ikanabangiriza ibicuruzwa, ibi bikabateza igihombo.
Mukamurenzi Jenifa, ucururira muri iryo soko yagize ati:” Iyo imvura iguye turanura ubwo utanuye bikanyagirwa cyangwa tugatwikira kandi ntiwaba watwikiriye ngo umuguzi azamenye ibyo ucuruza ikaba ari yo mpamvu tuvuga ko biduteza igihombo.”
Jenifa yakomeje agira ati: “Baramutse baje bakadusanira aha hagati kuko ni ho hava cyane niba bafite gahunda yo kuzasubirama isoko, bakazarisubiramo bitewe n’uko bari kubiteganya.”
Uwo mucuruzi yogeyeho ko amazi ashobora kwangiza isoko kuko uko imvura iguye amazi yireka, kandi ngo aho aguye ahatobora hakangirika.
Isoko rya Kabarore riherereye mu Murenge wa Kabarore mu Karere ka Gatsibo, riremwa cyane n’abo muri aka karere ndetse na bamwe baturutse mu Karere ka Nyagatare.
